- 2020 Ekaina 15
Amasa-Villabonako elkartasun sarea antolatzeko batzar irekia, asteazkenean 19:00etan udaletxean
Amasa-Villabonako udalak, egoera ekonomiko larriagatik gizarte bazterketa arriskua bizi duten herritarrei laguntzeko, elkartasun sare herritarra egituratzeko asmoa azaldu du. Covid-19aren krisiaren garairik zailenetan, herritar ugarik gehien behar zutenei laguntzeko boluntario gisa lan egiteko prestutasuna azaldu zuen eta udalak dinamika solidario horrti jarraipena emateko aukerak aztertu nahi ditu, etorkizunean ere gehien behar duten herritarrek boluntarioen laguntza eta babesa izan dezaten.
Azken hilabeteetan elikagai bilketa eta banaketarekin ere ikusi da, egoera zaurgarrian dauden pertsonen alde lan egiteko prest dauden herritar ugari daudela eta aurrerantzean dinamika horrekin jarraitu ahal izateko baliabideak jartzeko prest dago udala.
- 2020 Ekaina 09
Datorren astetik aurrera, Gizarte Zerbitzuek aurrez aurreko arreta eskainiko dute berriro
Aurrez aurreko arreta pertsonalizatua Covid-19aren krisia baino lehen egiten zen bezala ezingo da eskaini eta normaltasun horretara iristeko prozesua mailaz maila egingo da.
Oraindik arreta telematikoa lehenetsiko da eta Gizarte Zerbitzuetako teknikariek erabakiko dute zein pertsonari emango dioten aurrez aurreko zita. Herritarrek ezingo dute Gizarte Zerbitzu sailera zuzenen joan, aurretik udaletxeko behe solairuan dagoen Herritarren Arreta Zerbitzuan jakinarazi beharko dute hitzordua dutela.
Hitzorduen ordutegia ondorengoa izango da: 8:00tan; 9:30tan; 11:00tan; 12:30tan. Egun bakoitzean teknikari batek hartuko ditu zita hauek.
- 2020 Ekaina 09
Kontsumo bonoen salmenta arrakastatsua izaten ari da eta egun gutxitan bukatu daitezke
Amasa-Villabonako udalak martxan jarritako kontsumo bonoen kanpainak herritarren erantzun paregabea izan du, dagoeneko ia 9.000 bono saldu dira eta soilik beste mila edo mila eta bosteun inguru geratzen dira amaitu aurretik.
Kanpaina honetan 10.500 eta 11.000 bono artean banatuko dira eta bonoen finantziazioarako udalak ezarritako 30.000 euroak amaitzen direnean, bonoak saltzeari utziko zaio. Bonoen salmentako udal arduradunaren arabera, egun gutxitan iritsi daiteke momentu hori, seguruenik aste honetan bertan. Udalak hasiera batean, bonoen salmenta ekainaren 30 arte luzatuko zela jakinarazi bazuen ere, salmentaren erritmo azkarraren ondorioz, data hori baino lehen amaituko dira bonoak.
- 2020 Ekaina 03
Ostegunetik aurrera herriko pilotalekuetan jokatzeko aukera
Ekainaren 4tik aurrera (osteguna) pilotan federatu gabe dauden herritarrek Villabonako Behar Zana, Olaederra kiroldegiko eta Amasako pilotalekuetan pilotan jokatzeko aukera izango dute.
Pilota jokoko modalitate ezberdinetan jokatzeko aukera izango da: eskuz, palaz, joko garbian, frontenisean... Baina Covid-19aren osasun larrialdi egoeran jarraitzen dugunez, bete beharreko segurtasun baldintzak ezarri ditu udalak:
- Aurretik ordua hartu behar da: 943693980 telefonoan.
- Gehienez 2 pertsonak jokatu ahal izango dute aldi berean.
- Ezingo da pilotan jolastera ez den beste ezertarako sartu pilotaleku barrura.
- Aldagelak ezingo dira erabili.
- 2020 Ekaina 03
Astelehenetik aurrera TAO denboran mugatutako aparkalekua berriro martxan
Ekainaren 8an hasiko da aplikatzen
Udalak jakinarazten du Villabonako herri-gunean edo erdialdean ezarrita dagoen TAO zerbitzua eta ondorioz, marra urdina duten aparkalekuetan gehienez kotxea ordu betez aparkatzeko denbora muga, berriro ere martxan jarriko dela ekainaren 8an (astelehena).
Covid-19aren krisia eta konfinamenduaren ondorioz, pasa den martxoaren 18tik TAO-a indargabetuta egon da, orain arte kotxeak nahi adina denboran bertan aparkaturik eduki ahal izan direlarik.
- 2020 Ekaina 01
Udal liburutegiak zerbitzu murriztua eskaintzeari ekingo dio datorren asteazkenean
Villabonako udal liburutegia ekainaren 3an , asteazkena, berriro irekiko da. Oraingoz, mailegu eta itzulketa zerbitzuak baino ez dira hasiko.
Liburuak bertan eskatu ahal izango dira, goizez 9.30etatik 13.30etara eta arratsaldez 17:00etatik 19:00etara.
Liburutegian maileguan emandako liburuen itzulketa burutzeko Liburutegiaren atarian dagoen buzoia erabili ahal izango da orain arte bezala.
Edozein zalantza argitzeko, deitu 943 693224 telefonora edota idatzi E-mail hau spam roboten kontra babestuta dago. JavaScript aktibatuta izatea behar duzu hau ikusteko. helbidera.
