- 2019 Azaroa 21
Euskarazko Produktuen Katalogoaren edizio berria haur eta gazteentzako ehunka produkturekin
Urteko garai honetan seme-alabei edo ingurukoei euskarazko liburuak, musika edota jostailu eta jokoak erosi eta oparitzeko aukera paregabea izaten dela kontuan hartuz, Euskarazko Produktuen Katalogoaren edizio berria osatu dute, beste urte batez. Katalogoa bi atal nagusitan antolatua dago: 0-12 urte bitarteko haurrentzako produktuak eta 12-16 urte bitarteko gazteentzako produktuak.
Amasa-Villabonan ere urtero banatzen da euskarazko produktuen katalogoa, eta, aurten ere, haur hezkuntzako eta lehen hezkuntzako ikasle guztiei banatuko zaie.
- 2019 Azaroa 14
Udal Gobernuaren adierazpena Boliviako estatu kolpearen aurrean
Amasa-Villabonako Udal Gobernu Taldearen Adierazpena:
Azaroaren 10ean, Boliviako Estatu Plurinazionaleko Presidente Evo Moralesek dimisioa aurkeztu zuen, poliziek eta militarrek behartuta. Dimisioa aurkeztu baino lehen, Morales presidentearen, haren gobernuko kideen eta Boliviako beste hainbat hautetsiren senideen kontrako erasoak gertatu ziren.
Estatu kolpearen ondorioz, egoera benetan larria dela eta konfrontazio zibilerako arrisku handia dagoela nabarmendu nahi dugu. Izan ere, estatu kolpea bultzatu duten indarrak errepresioarekin oldartu dira Moralesen alde antolatutako herritarren aurka. Horrez gain, nabarmendu behar da, aurreko hilabetean izandako hauteskundeetan, Moralesek botoen %46 lortu zituela eta hauteskunde horiek errepikatzeko prestutasuna adierazi duela.
- 2019 Azaroa 07
Asteburuan Amasako festetarako gaueko autobus zerbitzu berezia
Udalak, Amasako San Martin jaiak direla eta, azaroaren 8 eta 9an, ostiral eta larunbatean, jaietara gerturatu nahi duten pertsona guztientzako gaueko garraio zerbitzua jarriko du martxan. Autobusa doakoa izango da eta Olaederra kiroldegitik abiatuko da. Autobusa Izaskun enpresakoa izango da, urdin kolorekoa eta tamaina txikikoa.
Ekimen honek ondorengo helburuei erantzun nahi die: Samartin festetako parte-hartzea bultzatzea, oinezkoen segurtasuna hobetzea, bilgailu pribatuaren erabilerak sortu ditzaken trafiko eragozpenak saihestea eta gehienbat emakumeei ostiraleko eta larunbateko jaietan parte hartu ondoren, etxera itzultzerakoan segurtasun handiagoa eta lasaitasuna emango dien indarkeria sexistarekiko babes mekanismo bat eskaintzea.
- 2019 Urria 28
Euskara mahaiaren lehen bilera: urriak 30 asteazkenena, 18:00etan udaletxean
Legegintzaldi honetako helburu nagusienetako bat arlo ezberdinetan parte-hartze eremuak eta prozesuak sustatzea da; herritarron iritziak kontuan hartuz eraiki nahi baitugu etorkizuneko Amasa-Villabona.
Euskara gaietarako ere, udal gobernu taldearen asmoa herriko euskara lan-mahai zabala eta irekia eratzea da. Euskalgintza eta eragileen inplikazioa bermatzea ezinbestekoa iruditzen zaigu. Mahai horren egitekoa izango da Amasa-Villabonan euskararen normalizaziorako dauden arazoak detektatu, hauek konpontzeko planak diseinatu, ekintzak martxan jarri eta emaitzen jarraipena egitea.
- 2019 Urria 24
Astelehenean Amasamendiko kudeaketari buruzko bilera irekia
Bilera datorren astelehenean, urriak 28, 19:00etan udaletxeko pleno aretoan izango da.
Udalak Amasamendiko eremu osoa modu integralean kudeatzeko plana onartu zuen 2017an eta plan horrek jasotzen dituen ekintza eta egitasmoak garatzeko konpromiso irmoa du udal gobernuak.
BILERA IREKIKO GAIAK:
- Amasamendiko Kudeaketa Planaren aurkezpen laburra.
- Agenda 21 ekintza planean jasotakoaren errepasoa.
- 2019-2023rako funtzionamendu berrirako proposamena.
- 2020ko aurrekontuak: Amasamendiren garapenerako partida ekonomikoa.
Udalak, gure mendien egoera eta etorkizunaren inguruko interesa edo kezka duten herritar guztiei parte hartzeko gonbidapena luzatzen die.
- 2019 Urria 23
Euskara ikasleentzat, establezimenduetako errotuluentzat eta euskarazko webguneentzat dirulaguntzak
2019ko urriaren 31n bukatutako da euskaltegietako ikastaroren bat egiteagatik, establezimenduetako errotuluak euskaraz jartzeagatik eta webguneak euskaraz egiteagatik dirulaguntza eskaerak Udalean aurkezteko epea.
Dirulaguntza horiei buruzko informazioa eskuragarri izango da Villabonako Udaleko Herritarren Arreta Zerbitzuan (Zuretzat) edo Euskara Zerbitzuan, 943 692100 telefonoan, 3329 luzapenean edo E-mail hau spam roboten kontra babestuta dago. JavaScript aktibatuta izatea behar duzu hau ikusteko. helbide elektronikoan.
