20Urria2020

002.jpg
Zu hemen zaude: Albiste nabarmenak
OHARRA irudia web

Alkateak eta udal gobernu taldeak babes osoa azaldu dio Udaltzaingoari, EAJ-PNVren kritiken aurrean

Amasa-Villabonako udal gobernuak hondorengo oharra plazaratu du, EAJ-PNV alderdiak komunikabideetan kaleratu zuen mezuari erantzunez:

Aste honetan, EAJ-PNV alderdiak alkatea, gobernu taldea eta udaltzaingoa publikoki kritikatu ditu, Amasa-Villabonako Udaltzaingoak protokolo propiorik ez duela eta kalean ikusten diren arau hauste ugarien aurrean isun gutxiegi jartzen direla esanez.

Honen aurrean, Amasa-Villabonako udal gobernuak honakoa adierazi nahi du:

1. Udal gobernu honek hasiera hasieratik eta bere iniziatibaz, Covid-19aren pandemia dela eta ezarritako segurtasun arauak errespetatzeko mezua kaleratu du etengabe, horretarako hainbat baliabide erabiliz: kartelak, panelak gutxienez bi buzonaketa, prentsaurrekoak... Zeregin horretan, oposizioaren laguntza eta elkarlana hutsaren hurrengoa izan da. Gobernu honek EAJ-PNVren proposamen bakarrak komunikabideen bidez jaso zituen eta hala ere kontutan hartuak izan ziren.

2. Gure Udaltzaingoak protokolorik ez izatea leporatzen digute. EAJ-PNVko kideei eskatzen diegu Udaltzaingoak protokolo propioa duen herriren bat ezagutzen badute, udal gobernuari jakinaraztea. Izan ere, alderdi ezberdinek gobernatzen duten Gipuzkoako herrietako udaltzaingoekin harremanetan jarri gara eta oraindik ez dugu herriko protokolo indibiduala duen udaltzaingo bakar bat ere aurkitu. Harrigarria egiten zaigu, inon ez dagoena, (EAJ-PNV gobernuan dagoen herrietan ere ez) Amasa-Villabonan ez egotea publikoki kritikatzea. Oposizio honek duen jarrera eta mailaren erakuslea. 

3. Udal gobernu honek bere babes eta konfidantza osoa adierazi nahi die Amasa-Villabonako Udaltzaingoa osatzen duten agente guztiei eta ez du onartuko inork beraien profesionaltasuna zalantzan jartzerik. Gure ustez, eta bereziki azken hilabeteetan lan bikaina egiten ari dira, EAEko Udaltzaingoak Koordinatzeko Zentrotik eta Osasun Sailetik jasotako jarraibideak zintzo betez. Udaltzainek, egunero jendeak arduraz joka dezan kontzientziazio lan eraikitzaile bat garatu nahi izan dute, identifikatutako arau-hausteen aurrean ohartaraziz edo kargu hartuz, hasieratik isuna edo zigorra helburu izan gabe. Gainera, arau-hausleek kasurik egin ez duten kasuetan, Udaltzaingoak zigor espedienteak osatu eta Segurtasun Sailera bideratu dituenean, Ertzaintzak zigor horiek ez ditu tramitatu eta ezerezean geratu dira. EAJ-PNVri egoera hori jakinarazi zaion arren, hau ez dute publikoki aipatu nahi izan.

4. Nahiz eta EAJ-PNVk hori irudikatu nahi izan, udal gobernu honek ez du uste gure herriko kaleetan "osasun publikoa arriskuan jartzen duten ez-betetze egoerak" ohikoak eta orokorrak direnik eta ondorioz, Udaltzaingoak isun edo zigor gutxiegi ezarri dituenik. Gure ustez, salbuespenak badaude ere, herritarren gehiengo oso handia jokabide arduratsua erakusten ari da egunez egun eta hori eskertzekoa da. Herri honetan arau-hausteak ohikoak direla ulertzera ematea, ez zaigu justua iruditzen. Jendea egiten ari den esfortzua asko baloratzen dugu.

5. Gure ustez ez da onargarria, EAJ-PNV alderdiak Covid-19aren pandemia egoera honetan oposizio politiko hutsa eta udal gobernuaren desgaste lana soilik egin nahi izatea, ezarri diren arauen gaiarekin eta udaltzaingoaren lanaren inguruan demagogia eginez. Momentu honek guztion arteko elkarlana eskatzen du, baina zoritxarrez gure udaleko oposizioaren aldetik ez dugu elkarlanerako ez asmorik ez gogorik ikusten. Pena bat da, baina guk oztopo guztien gainetik gogotsu lanean jarraituko dugu herri honen alde.

DIRULAGUNTZA COVID INBERTSIOAK

Covid-19ari aurre egiteko dendari eta ostalariek egin dituzten inbertsioak arintzeko dirulaguntzak emango ditu udalak

Gaur argitaratu dira Gipuzkoako Aldizkari Ofizialean Amasa-Villabonako udalak martxan jarriko duen diru laguntza berri honen oinarriak: GAO U-15. Covid laguntzak Villabona

Covid-19ari aurre egiteko merkatari eta ostalariei laguntzeko programa hau Gipuzkoako Foru Aldundiari dagokio nahiz eta diru banaketa udalen bitartez egingo den, tokian tokiko erakundeak zehaztutako baldintzen arabera. Amasa-Villabonako udalak 25.956 euro jaso ditu. Dirulaguntza hauetarako oinarriak eta deialdia pasa den urriaren 7an onartu ziren 2020/534 Alkatearen Dekretu bidez. 

Azalpena

Herriko dendari eta ostalariek, Covid-ak exijitzen dituen segurtasun eta osasun protokoloak bete ahal izateko, lokalak eta lan egiteko moduak egokitu behar izan dituzte, horretarako hainbat inbertsio eginda. Gastu horiek arintzera datoz ez-ohiko dirulaguntza hauek. Ez dira diruz lagunduko maskarilla, gel eta antzekoetan egindako gastuak baina bai langile eta bezeroen babes eta segurtasunerako ekipamendu bereziak eskuratzeko eta lokala egokitzeko inbertsioak. 

Establezimenduek bete beharreko baldintzak

Programa honen dirulaguntzen onuradunak beren kontura lanean diharduten pertsonak edo autonomoak eta Villabonako enpresak edo elkarteak izan daitezke, eta baldintza hauek bete beharko dituzte:

  • Villabonan kokatutako establezimendua edukitzea.
  • Villabonako Udalarekin zorrik ez edukitzea.
  • Villabonan kokatutako establezimenduaren jarduera nagusia publikoa bertatik bertara artatzekoa izatea.
  • Covid-19 pandemiagatik publikoa artatzearekin lotutako zerbitzua emateko higiene edo eta babes neurri berriak ezarri behar izatea.

Diruz lagunduko diren jarduerak

Diruz lagundu ahal izango dira inbertsioak eta ekipamenduak, baita inbertsioak gauzatzeko azterketak ere, jarduera ekonomikoak Covid-19 edo koronabirusari aurre egiteko prestatzera bideratuak badaude. Besteak beste, honako hauek izango dira:

  • Lokalak eta laneko moduak egokitzea.
  • Segurtasun eta osasunaren irizpideak/protokoloak betetze aldera, merkataritza edo ostalaritza lokalak moldatzeko inbertsioak eta ekipamendua.
  • Laneko moduak egokitzeko inbertsioak eta ekipamendu erosketak.

Diruz lagundu daitezkeen jarduerak 2020ko martxoaren 14tik aurrera egin beharko dira (fakturaren data hartuko da kontuan) eta eskaera aurkeztu arte.

Ez da diruz lagunduko material kontsumigarrien erosketa, hala nola, gel hidroalkoholikoak, maskarak…

Dirulaguntzaren zenbatekoa

Programa honek diruz lagun daitekeen gastuaren % 100 finantzatuko du, gehienez 1.500 euro izanik establezimendu bakoitzeko. Establezimendu bakoitzeko dirulaguntza bakarra emango da.

Dirulaguntza honetarako ezarritako finantziazioa nahikoa ez bada egindako eskaera guztiei %100ean erantzuteko, dirulaguntzak onartutako gastuaren araberako proportzioan murriztuko dira, eskaera guztiei erantzun ahal izateko.

Eskaera egiteko lekua

Eskaerak udaleko Herritarren Arreta Zerbitzuan (udaletxeko behe solairuan) aurkeztu beharko dira.

Eskaera orriak establezimenduaren titularrak edo legezko ordezkariak aurkeztu beharko ditu, udalaren webgunean (www.villabona.eus) argitaratuko den eskaera ofizialaren ereduan:

ESKAERA EGITEKO INPRIMAKIA

Aurkeztu beharreko dokumentuak

  1. Eskaera orria beteta.
  2. JEZ alta ziurtagiria Villabonan, txikizkako merkataritza eta ostalaritzaren sektoreetako epígrafe ekonomikoetan.
  3. Eskatzailearen eta, hala badagokio, ordezkariaren NAN-aren kopia.
  4. "Memoria" izeneko eredua, Covid 19ari aurre egiteko eta jarduera ekonomikoa horretara prestatzeko zuzendutako jardueren memoria: MEMORIA EREDUA
  5. Dirulaguntzaren helburua diren gastuen fakturen zerrenda, ondorengo taula beteta: FAKTURAK JUSTIFIKATZEKO FITXA Egindako gastuen fakturen kopiak ere aurkeztu beharko dira, banku ordainagiriarekin batera.

* 2. ataleko dokumentua ez da aurkeztu beharko, baldin eta Udalarengatik «Covid-19 koronabisuraren bilakaerak eragindako galerak arintzeko txikizkako merkataritza eta ostalaritza establezimenduentzako laguntza ekonomikoa» jaso bada.

Eskaerak aurkezteko epea

Eskaerak aurkezteko epea, 2020ko azaroaren 30ean amaituko da.

Txertoa1

Urriaren 13an hasiko da gripearen aurkako txertaketa, Gurea Zinean

Gripea oso kutsakorra denez, oso azkar hedatzen da. Pertsona gazte eta osasuntsuei eragiten dienean ez du arazo handiegirik sortzen, eta ohean atseden hartuz eta sendagai egokiekin pasatzen da. Baina, adinekoei edo osasun-arazoak dituztenei eragiten dienean, konplikazio larriak sortu ditzake. Beraz, talde horietako lagunentzat bereziki mesedegarria da txertoa jartzea. Horregatik, urriaren 13an hasiko den gripearen aurkako txertaketa-kanpainan parte hartzera gonbidatu nahi zaituztegu.

Aurten, antolaketa-arrazoiengatik, txertoa Villabonako Zine Aretoan jarriko da (GUREA ZINEAN), goizeko 10:15etatik 16:30etara. Horretarako, hitzordua eskatu beharko da aurrez, telefonoz herriko osasun etxera deituta, 943 00 69 70 zenbakira.

Kanpaina honetan txertatuko diren pertsonak 65 urtetik gorakoak eta arrisku-talde nagusienetakoak dira (BGBK, diabetesa dutenak, gaixotasun kardiobaskularrak dituztenak eta haurdun daudenak). Osasungintzako profesionalak, langile sozio-sanitarioak eta familia-inguruneko zaintzaileak ere txertatuko dira.

Txertoa jarri nahi dutenek baina aurreko taldeetako batean ez dauden pertsonek urriaren 31tik aurrera deitu beharko dute anbulatoriora, lehen fasean arestian deskribatutako arrisku-taldeei emango baitzaie lehentasuna.

Azkenik, eskerrak eman nahi dizkiegu herritar guztiei eman duten laguntzagatik eta parte hartzeagatik.

Azpikategoria

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.