26Iraila2020

008.jpg
Zu hemen zaude: Albiste nabarmenak
Prentsaurrekoa 2

Udalak Santio jairik ez dela izango azpimarratu du eta tabernetako ordutegia murriztea erabaki du

Gaur goizean udaletxean egindako agerraldian, Beatriz Unzue alkateak, Xabat Laborde alkateordeak eta Arantza Lopez zinegotziak eman dute udalak hartu dituen erabakien berri. 

Honakoa da Amasa-Villabonako udalak argitaratu duen oharra:

LEHENTASUN BAKARRA: HERRITARRON OSASUNA

Egunero COVID-19aren berragertzeen berri izaten ari garen honetan, Amasa-Villabonako udal ordezkariak kezkatuta gaude. Birusak geure artean jarraitzen du, pandemia ez dugu gainditu eta ezinbestekoa da guztiok arduraz jokatzea eta segurtasun neurriak behar bezala betetzea. Zentzu horretan, beti maskara erabiltzea, pertsonen arteko distantzia mantentzea eta jende pilaketak saihestea oso garrantzitsua da. Kezkaz bizi dugu batez ere gaueko parranda giroari lotuta, gazteen artean ematen ari den birusaren zabalpena eta hori Amasa-Villabonan ere gerta ez dadin neurriak hartzera behartuta ikusi dugu gure burua. Izan ere, inon ez gaude COVID-19ren agerpen eta zabaltzeetatik salbu.

AURTEN EZ DA SANTIO JAIRIK IZANGO

Jakina denez, Santio Jai Batzordeak jai egitaraurik ez osatzea eta jaiak bertan behera uztea erabaki zuen. Gure ustez zentzuz eta ardura osoz hartutako erabaki egokia izan da, ez baikaude festa eta ospakizunetarako.

Beraz, udaletik argi utzi nahi dugu uztailaren 24tik 31ra ez dagoela jairik, horrek esan nahi duen guztiarekin.

Ondorioz, udaletik honako deiak luzatu nahi dizkiogu jendarteari:

  • Ez etorri Amasa-Villabonara festa eta parranda egitera, ez baita horrelakorik egongo.
  • Herriko jendeari, jaien ordezko plan alternatiborik ez osatzea eskatzen diogu. Gogorarazi nahi dugu debekatuta dagoela 10 lagunetik gorako koadriletan bildu eta hara eta hona ibiltzea.

TABERNEN ORDUTEGIA MUGATZEKO ERABAKIA

Udalak Amasa-Villabonako ostalaritza establezimenduen ordutegiak mugatzea erabaki du: uztailaren 23tik aurrera (egun hori barne) gehienez ere goizaldeko 01:00ak arte mantendu ahal izango dira tabernak zabalik eta ordu horretan derrigor itxi beharko dute. Udal gobernuak Alkate-Dekretu bidez hartu du erabakia eta Gipuzkoako Aldizkari Ofizialean argitaratuko da. Hemen kontsulta daiteke dekretua: Tabernen ordutegiak murrizteko erabakia

Hainbat tabernarik bere kabuz erabaki hori hartua zuten dagoeneko eta udaletik tabernari hauek erakutsi duten ardura eta zentzua txalotu nahi dugu. Espero dugu herriko tabernari guztiak modu berean portatzea eta herritarren osasuna lehenestea, norberaren interes ekonomikoen gainetik.

Prebentzio neurri honek sektorean ondorio kaltegarriak sortuko dituela jakitun gara, baina askoz hobea iruditzen zaigu orain neurri hau ezartzea, ondoren, birusaren zabalpena medio, are neurri zorrotzagoak hartu behar izatea baino.

Honekin lotuta, tabernak ixtean jendea kaleetan taldeetan bilduta geratzea saihestu behar da, ez baitugu ezer lortuko tabernak ixtearekin, ondoren jendea kalean pilatzen bada.

ARDURAZ JOKATZEKO DEIA

Aipatu ditugun eskaerak eta neurriak ez dira inoren gustukoak eta guretzat ere ez da batere erraza izan horrenbeste maite ditugun herriko jaiei muzin egin behar izatea. Baina guztion osasuna jokoan dagoenean, ezin diogu arduragabekeriari inolako zirrikiturik utzi.

Mesedez, izan gaitezen arduratsuak eta bete ditzagun segurtasun neurriak zorrotz, hori izango baita birusa geldiarazteko modurik eraginkorrena.

Konfinamendu garaian erakutsi genuen gizarte arduratsu eta serioa garela, ez dezagun orduko ahalegina alferrik galtzen utzi.

salir-calle-coronavirus-mascarilla-1024x580

Bihartik aurrera derrigorrezkoa izango da maskara jantzita eramatea

Nekane Murga Osasun sailburuak eguneroko prentsaurrekoan eman du berria: EAEn ostegunetik bertatik, uztailak 16, derrigorrezkoa izango da maskara jantzita eramatea gune publiko guztietan, kalean bezala komertzio edo tabernetan. Nafarroan ostiralean ezarriko da indarrean neurri bera.

Osasun sailburuak berretsi du Eusko Jaurlaritzak Araba, Bizkaia eta Gipuzkoan maskararen erabilera derrigortu egingo duela 24 orduko epean: EAEn musukoa erabiltzea derrigorrezkoa izango da kalean eta espazio publiko itxietan, pertsonen arteko distantzia edozein izanda ere.

Ostalaritzan, taberna, jatetxe eta elkarte gastronomikoetan maskara erantzi ahal izango da soilik jan edo edateko unean, beste une orotan jantzida eduki beharko da. Gainera, mahai baten inguruan gehienez ere 10 pertsona egon ahalko dira, berdin du barruan edo kanpoan egon.

Hondartzetan eta igerilekuetan ere maskara erabiltzea derrigorrezkoa izango da joan-etorrietan, soilik kendu ahal izango da etzatean edo esertzerakoan, eta hau ere pertsonen artean metro eta erdiko tartea gordeta eta maskararik gabeak elkarbizitza unitate bereko pertsonak izatekotan.

IMG20200512104304web

Hiri hondakinen kudeaketa: Atzeraka goaz

2015ean adostasun politiko garrantzitsua lortu zen gaur egungo bilketa sistema martxan jartzeko. Dena den, hainbat aldagai kezkagarri ikusi ditugu hondakinen bilketari dagokionez: 

  • Gero eta zabor gehiago botatzen da lurrera, edukiontzitik kanpo.
  • Organikoan gaizki sailkatutako hondakin kopuru handiak jasotzen dira.
  • Traste zaharrak edozein egunetan uzten dira kalean.
  • Landa inguruko hainbat edukiontzi gune. zabortegi inprobisatu bilakatu dira.
  • Gaikako bilketaren portzentajea beherantz doa.

Arazo hauei irtenbidea emateko hainbat neurri jarriko dira martxan:

Edukiontziak irekita mantenduko dira (oraingoz)

Covid-19aren osasun krisia medio, edukiontziak irekitzea erabaki zen. Beste hainbat herritan berriz itxi badira ere, Amasa-Villabonan irekita mantentzea erabaki dugu. Erabaki hau ez da behin betikoa eta atzeraezina izango; hondakinen gaikako bilketa datuen, organikoaren kalitatearen eta lurrera botatzen den zabor kopuruaren eboluzioaren arabera baloratuko da, mantentzea edo itxiera sistemara bueltatzea. Udalak hurrengo hilabeteetako datuak aztertuko ditu eta marra gorri batzuk ezarri ditu: ez da onartuko gaikako bilketa %70etik behera jaisterik, organikoarekin hondakin desegokien portzentajea handitzerik eta lurrera botatzen diren poltsa kopurua ez gutxitzerik

Beraz, guztion esku egongo da edukiontziak berriz itxi behar izatea edo ez. Joka dezagun arduraz eta egin ditzagun gauzak behar bezala.

Jarraipena zorroztuko da

Zaborra edukiontzi kanpoan edota ez dagokion lekuetan uzteari jarraipen estua egingo zaio. Udaltzaingoak jarraipen berezia egingo dio gai honi. Elkarbizitzaren aurkako ekintza hauek egiten dituztenei lehen isunak ere jarri zaizkie dagoeneko.

Mendi guneetan sortutako zabortegi inprobisatuen inguruan ikerketak ere egin dira. Zabortegi hauetara zaborra nork botatzen duen identifikatu da zenbait kasutan eta hauen aurkako lege ekintzak ere martxan jarriko dira.

Horrez gain Komizar parkean jarraipen sistema berri bat jarri da martxan. Parkeko mahaiak numeratu egin dira. Udaltzainek mahai bakoitzeko arduradun bat identifikatuko dute eta hau egingo da mahai horren ingurua txukun uztearen arduradun.

Informazio kanpaina

Nahiz eta gutxiengo batek gaziki egiten duenak irudi negargarriak utzi, herritar gehienek ingurumenarekiko eta zaborren gaikako bilketarekiko jarrera positiboa dute. Amasa-Villabona edukiontzi sistema edukita Gipuzkoa mailan birziklapen tasa handienetakoa zuen herria izan da orain arte.

Hala ere, azkenaldian beheranzko joera bat egiaztatu da. Hori dela eta biztanleen hezkuntzan arreta jartzea erabaki dugu. Horretarako Amasa-Villabonara bizitzera datozenei hondakinen kudeaketari buruzko informazioa emango zaie. Bestalde, herriko eraikinetako administrariei kartel informatibo bat bidaliko zaie portalean jartzeko.

Horrez gain udalak datuak argitaratuko ditu hilero, herritarrek gai honi buruzko informazio argia izateko.

Azaldu ditugun arazo nagusiak konponbidean jartzen ez badira, udala herritarrek ordaintzen duten zabor bilketaren tasa igotzera behartuta egongo da, udalaren gastuak asko handitzen baitira bilketako datuak okertzen direnean.

Azpikategoria

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.