26Iraila2020

011.jpg
Zu hemen zaude: Albiste nabarmenak
IMG20200712005242web

Argiteria publiko berria Villabonatik Arratzainera igotzeko bidean

Amasa-Villabonako udalak argiteria publiko berria ezarri du Villabonako Txermin auzotik Arratzain baserrira, Fleming herri eskolara, futbol zelaira edota Otelarre auzoko etxebizitzetara igotzeko dagoen oinezkoen bidean. 

Bide honek orain arte ez zuen inolako argiztapenik eta puntu ilun nabarmena zen. Izan ere bide hau jende dezentek erabiltzen du; futbol entrenamendura joaten diren gaztetxoek, ikasleek, Otelarre auzoko hainbat bizilagunek... Udalak egindako inbertsio berri honekin, ondo argiztatutako bidea da segurtasunean asko irabazi delarik.

Argiteria publiko honetan LED teknologiadun argiak ezarri dira faroletan, kontsumo gutxikoak eta energia eraginkortasun egokia dutenak. Guztira 16 argi-puntu edo farola berri ezarri dira. Hauek ezartzeko obra udal brigadako langileek egin dute, udalaren baliabide propioak erabiliz.

Inbertsio berri hau, herriko puntu ilunak identifikatu eta desagerrarazteko udalak garatu duen plangintzaren baitan kokatzen da, batipat emakumeen segurtasuna bermatzeko helburuarekin. Bestalde, proiektu hau herriko argindar kontsumo publikoaren eraginkortasuna hobetzeko martxan dagoen energia planean ere jasota dago.

Beraz, hirigintza saileko inbertsio honekin udalak beste aurrera pausu bat eman du bi arlo garrantzitsu hauetan.    

IMG20200712103207

Normaltasuna izan da nagusi Amasa-Villabonako hauteslekuetan

Uztailaren 12ko Eusko Legebiltzarrerako hauteskundeak bereziak izan dira, Covid-19aren osasun krisiak eta azken asteetan hainbat tokitan gertatu diren birusaren berragertzeek, segurtasun neurri zorrotzak ezartzera behartu baitute udala.

Lehenik, bozketa leku bakarra izatetik hiru izateko erabakia hartu zuen udalak, bozketa mahai guztiak Olaederra kiroldegian mantendu ezkero jende pilaketak izateko arrisku nabarmena baitzegoen. Ondorioz, Gurea Zinea eta Txermin auzoko Zubimusu Ikastolaren eraikina erabili ziren bozketa leku izateko.

Horrez gain, jendearen arteko metro terdiko distantzia uneoro mantendu zedin, bozketa leku bakoitzera gerturatu eta bertatiki irteteko ibilbide berezituak ezarri ziren eta bozketa leku bakoitzeko sarreran gel hidroalkoholiko pote handi bana jarri ziren.

Ez zen aipatzeko moduko gorabehera edo arazorik izan

Normaltasuna izan zen nagusi egun osoan zehar. Herritarrek bikain bete zituzten ezarritako jarraibide guztiak eta ez zen inolako arazorik sortu. Despisteren bat edo beste izan ziren arren, ez zuten garrantziarik izan. Mahaietan egotea egokitu zitzaien herritarrek ere portaera eredugarria izan zuten, beren zeregina behar bezala betez.

Amasa-Villabonako udalak bereziki eskertu nahi die hauteskunde egun berezi honetan lanean aritu diren udal langile guztiei; garbitzaile brigadakoei, udaltzainei, idazkaritzako langileei... eskerrik asko egindako lan guztiagatik.

Hauteskundeetako emaitzak Amasa-Villabonan (2020-07-12)

  • EH Bildu: 1.101 (% 47,31)
  • EAJ-PNV: 844 (% 36,27)
  • PSE-EE/PSOE: 180 (% 7,87)
  • Elkarrekin Podemos: 93 (% 4)
  • PP+CS: 55 (% 2,36)
  • Vox: 19 (% 0,82)
  • Equo Berdeak: 16 (% 0,69)
  • PACMA/ATTKAA: 9 (% 0,39)
  • Aulki Zuriak: 4 (% 0,17)
  • PUM+J: 2 (% 0,09)
  • Zero Murrizketa: 1 (% 0,04)

Abstentzioa %45,51
Baliogabeak: 11 (%0,47)
Zuriak: 15 (%0,64)
Hautagai-zerrenden botoak: 2.327

 

IMG20200701151823

Uztaileko kultur egitarau berezia aurkeztu da

Gaur eguerdian egindako agerraldian, Beatriz Unzue alkatea, Garazi Bengoetxea kultura zinegotzia eta Joxean Kubero kultura teknikariak parte hartu dute eta udaleko Kultura sailak uztailerako prestatu duen egitaraua arkeztu dute publikoki.

Honakoak izan dira Beatriz Unzueren hitzak gaurko aurkezpenean:

"Gaurkoan, udaleko kultura sailetik uztailerako prestatu dugun kultur egitarau bereziaren berri eman nahi dizuegu.

Lehenik eta behin, ezin dugu aipatu gabe utzi kultura sektoreak bizi duen egoera larria. Covid-19aren krisiak oso gogor kolpatu ditu gure kultur sortzaileak, antzezleak, musikariak etab. Hilabete luzetako geldialdia ekarri baitu.

Hori nabarmen geratu zen euskal kulturgintzak apirilaren 21 eta 22an egindako greban. Guk udal gisa, bat egin genuen greba horrekin, egoeraren larritasuna konpartituz.
Hau esanda, Amasa-Villabonako udalean ahalegin berezia egin nahi izan dugu martxoko eta apirileko kultur programaziorako hitzartuta zeuden emankizunak bertan behera utzi beharrean, atzeratu eta udazkenean eskaintzeko. Esan behar da ia kasu guztietan lortu dugula.

Bestalde, uztaileko kultur eskaintza berezi hau "Berpiztu Amasa-Villabona" dinamikaren baitan kokatzen dugu. Hilabete luzetan kulturaz bertatik bertara gozatzeko aukerarik gabe egon gara. Orain aukera zabaldu denean, herritarrei berriro eskaintza mahai gainean jarri nahi izan diegu, gure kaleak piztu eta alaitu daitezen. Zentzu honetan kale antzerkia eta aire libreko zine emanaldiak azpimarratu nahi genituzke, berritasun nagusi gisa.

Gure ustez kultur programa zabala, anitza eta oso erakargarria aurkezten dugu eta herritarrak animatzen ditugu gerturatu eta gozatzera."

Ondoren Joxean Kuberok aurkeztu ditu egitarauan sartu diren ekimen kulturalen xehetasun nagusiak. Esan beharrik ez dago kultur ekintza guztietarako segurtasun neurri bereziak ezarriko direla, pertsonen arteko distantziak uneoro errespetatu daitezen.

Egitarau osoa: HEMEN

 

Azpikategoria

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.