13Uztaila2020

006.jpg
Zu hemen zaude: Albiste nabarmenak
Screenshot 2020-05-08-19-37-17-91

Udal Gobernuak, Villabonan izandako atxiloketaren ondoren argitaratutako albistearekin "alarma soziala" sortu izana leporatu eta azalpenak ematea eskatu dio Segurtasun Sailari

Amasa-Villabonako udal gobernuak honako oharra kaleratu du gaur:

Pasa den apirilaren 27an Villabonako Kale Berrian gizon bat atxilotua izan ondoren, maiatzaren lehenean honako titularra zuen albistea argitaratu zen Ertzaintzaren web orrialdean: "Ertzaintzak Villabonan atxikita zuten emakume bat askatu du eta bahitzailea atxilotu du".

Albiste edo prentsa ohar horretan, besteak beste honako adierazpenak irakur zitezkeen: "biktimak bahitzailearen zaintza saihestea eta familiarteko bati ahots-mezu bat bidaltzea lortu zuen", "hiltzeko mehatxupean" edota "hil egingo zuela esan zion". Normala denez, Euskal Herriko eta estatuko komunikabide ugarik albiste latz honen berri eman zuten.

Dudarik gabe aipatzen direnak delitu oso larriak dira eta indarkeria matxista kasu nabarmena dela ondorioztatzen da.

Hori horrela izanda, udalak lehen momentutik indarkeria matxista kasuetarako onartuta dagoen protokoloa aktibatu zuen eta neurriak hartu zituen berehala. Jakina denez, udaleko alderdi politiko guztiekin ez-ohiko bozeramaile batzordearen bilkura egin zen eta adostutako Erakunde Adierazpen bat kaleratu zen gertaera gaitzetsiz.

Publikoki egindako akusazio larri horien ondoren, susmagarria kalean libre geratu zen berehala, inolako neurri zigortzailerik gabe. Beraz, esan daiteke ustezko delitu larri horiek ez dutela proportzio bereko ondoriorik izan.

Honek harridura, kezka eta alarma soziala piztu du Amasa-Villabonan. Nola liteke Ertzaintzak berak eta komunikabideek bahiketa, hiltzeko mehatxuak etab. egon izana publikoki aireratu ondoren, pertsona hori kalean libre izatea? Zalantza guztiz logikoa da eta herritarrak kezkatuta eta haserre egotea ere ulergarria da.

Udalaren ustez, kasu honetan Segurtasun Sailak edota Ertzaintzak egindako kudeaketa ez da batere egokia izan. Horrelako gai serioetan ezin da arinkeriaz aritu, inolako beharrik gabe alarma soziala piztuz eta egiaztatu gabeko akusazioak publikoki zabalduz. Horrelako egoeren aurrean beste modu batera jokatu beharra dago, zorroztasun gehiagorekin.

Guzti hau adierazi ondoren, Amasa-Villabonako udalak azalpenak ematea eta kudeaketa arduragabe honen erantzukizunak argitzea eskatzen dio Ertzaintzari edota Eusko Jaurlaritzako Segurtasun sailari.

IMG 9705 tokikom 735x413

Herriko merkataritza eta ostalaritzako laguntzak onartuta, eskaera egiteko epea maiatzaren 8tik 18ra izango da

Gaur argitaratu dira Gipuzkoako Aldizkari Ofizialean (GAO) Amasa-Villabonako udalak onartutako Covid-19agatik itxita edo jarduera partzialki etenda izan duten merkataritza eta ostalaritza establezimenduei laguntzeko diru laguntzen oinarriak. Udalak urgentziazko trataera eman die diru laguntza hauei eta egun gutxitan argitaratzea lortu da.

Ondorioz, bihar bertan jarriko da martxan diru laguntza hauek emateko prozedura guztia.

DIRU LAGUNTZEN OINARRIAK: HEMEN

Eskaera egiteko epea:

  • Maiatzak 8tik 18ra (biak barne)

Covid-19aren eraginez denda edo taberna itxita eduki behar izan duten merkatari eta ostalariek laguntza hauek eskatzeko epea ere bihar bertan hasten da eta maiatzaren 18raino luzatuko da.

Aurkeztu beharreko dokumentuak

Udalak laguntza hau eskatu eta jasotzeko prozedura erraztu nahi izan du, tramitazioak eta "papeleoak" ahalik eta gehien murriztuz. Ondorioz, eskaera egin behar izango duten merkatari eta ostalariek bi inprimaki bete eta agiri bat aurkeztu beharko dute.

  • Laguntza eskatzeko inprimakia Deskargatu
  • Zinpeko Aitorpena egiteko bete beharreko inprimakia Deskargatu
  • Jarduera Ekonomikoen gaineko Zergaren Alta historikoaren dokumentua. Txikizkako merkataritza edo ostalaritza jarduera burutzen duela egiaztatzen duena.

Dokumentazioa aurkezteko aukerak:

  • Udaletxeko Herritarren Arreta Zerbitzuko bulegoan, aurretiazko hitzorduarekin. Hitzordua hartzeko E-mail hau spam roboten kontra babestuta dago. JavaScript aktibatuta izatea behar duzu hau ikusteko. helbide elektronikoara idatzi edo 943 692100 telefonora deituz hartu daiteke. Bulegoan bertan aurkeztu ahal izango da Jarduera Ekonomikoen gaineko Zergaren alta historikoaren dokumentua eta inprimakiak bertan bete daitezke, behar izanez gero, udal langileen laguntzarekin.
  • Telematikoki edo posta elektroniko bidez. Albiste honetan deskargatzeko ezarri ditugun inprimakiak deskargatu. bete, eskaneatu (edo argazkia atera) eta Jarduera Ekonomikoen gaineko Zergaren alta historikoaren dokumentuarekin batera E-mail hau spam roboten kontra babestuta dago. JavaScript aktibatuta izatea behar duzu hau ikusteko. helbidere bidalita. 
Udaletxea morea web

Udalaren Erakunde Adierazpena, ustez emakume bat atxikitzeagatik izandako atxiloketaren harira

Gaur goizean hainbat komunikabidetan argitaratu den albistea dela medio, gaur 12:00etan udaleko bozeramaileen batzordearen urgentziazko bilkura izan da eta bertan Erakunde Adierazpena onartu da alderdi politiko guztien arteko adostasunarekin.

Adierazpen honen bidez, udalak bere gaitzespena eta biktimarekiko elkartasuna adierazten ditu eta herritarrei dei egiten die gaur 20:00etako txalo zaparrada indarkeria eta jazarpena sufritzen ari diren emakumeei elkartasuna adierazteko baliatzera eta etxeetako balkoi edo lehioetan more koloreko bereizgarriak jartzera.

ERAKUNDE ADIERAZPENA

GERTAERAK

Pasa den astelehen arratsaldean Ertzaintzak 41 urteko gizon bat atxilotu zuen Villabonan, ustez, pertsona horrek Amasako Etxezarreta izeneko baserrian emakume bat bere borondatearen kontra atxikitzeagatik. Gizonak bere haurra zaintzeko kontratatu zuen emakumea, baina etxera eraman ondoren, heriotza mehatxuekin atxiki zuen bere borondatearen kontra.

Segurtasun Sailak jakinarazi duenez, emakumeak iaz ezagutu zuen gizona. Horrek bere semea zaintzeko lana eta dokumentazioa eskaini zizkion. Emakumeak lan egiteko eskaintza onartu ondoren, gizonak Etxezarreta baserrira eraman zuen, eta sakelako telefonoa kendu zion. Emakumeak, ordea, pasa den igandean senide bati ahozko mezu bat bidaltzea lortu zuen. Senide horrek Ertzaintza ohartarazi zuen, baina non zegoen ezin izan zuen zehaztu. Ikerketa bati esker emakumea non zegoen jakin ahal izan zuen Ertzaintzak.

Hainbat egunez aritu zen Ertzaintza inguruetan emakumearen bila, eta azkenean gizona identifikatu ondoren, emakumea aipatutako baserrian zegoela ondorioztatu zen. Astelehenean Villabonako herri-gunean gerarazi zuten autoa. Emakumea hor zihoan eta askatu egin zuten. Gizona atxilotu egin zuten.

Gertaera hau dela medio, udaleko bozeramaile batzordeak urgentziazko bilera egin du gaur 12:00etan eta honako Erakunde Adierazpena onartu du alderdi politiko guztien arteko adostasunez:

1. Amasa-Villabonako udalak ustezko indarkeria matxista kasu hau erabat arbuiatu eta gaitzesten duela adierazten du

2. Amasa-Villabonako udalak elkartasuna adierazten dio ustez erasotua izan den emakumeari, bere sendiari eta lagun nahiz gertukoei.

3. Amasa-Villabonako udalak konpromiso irmoa hartzen du genero-indarkeriaren aurka etengabe borrokatzeko, indarkeria hori pairatzen duten emakumeekiko koordinazioan eta lankidetzan, bai eta beste administrazio publikoekin ere, bide bakarra indarrak batzea baita indarkeria matxistarik gabeko gizarte bat lortzeko.

4. Amasa-Villabonako udalak, indarkeria edo jazarpena pairatzen ari diren emakumeei edo indarkeria zantzuak antzeman dituztenei salaketa jartzeko urratsa ematera animatu eta eskatzen die. Era berean, udal honek emakumeen kontrako indarkeria kasurik bada, Udaltzaingoarekin edo Ertzaintzarekin harremanetan jartzeko edo emakumeen kontrako indarkeria salatzeko telefonoa (900 840 111) erabiltzeko deia egiten du.

5. Udalaren deia herritarrei:

  • Gaur 20:00etan etxeetako leiho eta balkoietan egiten den ohiko txalo zaparrada berezia izango da. Gaurko txaloak, konfinamendu egoeran indarkeria eta jazarpena sufritu duten edo sufritzen ari diren emakume guztiei elkartasun eta babes mezua helarazteko izango dira.
  • Udalak herritarrak animatzen ditu balkoi eta leihoetan more koloreko elementu bereizgarriak ezartzera, emakumeen kontrako indarkeria oro salatzeko.

Azpikategoria

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.