16Urtarrila2021

003.jpg
Zu hemen zaude: Albiste nabarmenak
Santiago 2

Udalak herriko helduak zoriondu ditu Adineko Pertsonen Nazioarteko egunean

Gaurko eguna, Pertsona Helduen Nazioarteko eguna izanik, Amasa-Villabonako udalak ez du adineko pertsona guztiei esker ona adierazteko aukera galdu nahi izan. Era berean udal ordezkariek azpimarratu nahi izan dute, gu honaino iritsi bagara, haiek lehenago izan direlako dela.

Horregatik, gure udalerrian bizi diren adineko guztiak, Santiago Egoitzan bizi diren egoiliar guztiak, eta haietaz hain ondo zaintzen duten guztiak zoriondu ditu Amasa-Villabonako udalak.

100 urtetik gorakoei tarta bana
Amasa-Villabonan badira 100 urtetik gora dituzten bizilagunak: Mª Jesús López, 104 urtekoa, Juani Arregi, 101 urtekoa, eta Gregorio González, 100 urtekoa. Beraz, gaur eguerdian zehar, Beatriz Unzue alkateak eta Arantxa Lopez Gizarte Zerbitzuetako zinegotziak adineko hauei tarta bana eskaini diete aitortza moduan. Santiago Egoitzan ere izan dira bertako langileen ezinbesteko lana eskertuz. Zorionak guztiei! 

Eta bide batez, gure zorion-agurra luzatu zaie, baita ere, persona helduen familiartekoei, dedikazio osoz laguntzen eta alaitzen baitute haien egunerokotasuna, bizitzeko ilusioari eutsiz.

Zaintzaren garrantzia azpimarratu du udalak
Une hauetan sekula baino arrazoi gehiago daude zainketaren garrantzia azpimarratzen jarraitzeko. Komunitate-osasuneko programak, pertsona nagusien parte-hartze aktiboa, eta gizarte eta familia-harremanen garrantzia nabarmendu behar dira, adineko pertsonen osasun psiko-emozionalaren mesedetan ezinbesteko ekarpena egiten baitute. Horregatik lanean jarraitzen dugu eta jarraituko dugu!

Eskerrik asko! Udalbatza osatzen dugunon eta amasa-billabonatar guztion izenean.

photo 2020-09-30 13-12-51

Udalak BERTAN ekimenean lan egingo du, landa eremuetako biztanleriaren zahartzeari aurre egiteko

Amasa-Villabonako Udalak, Euskal Autonomia Erkidegoko, Nafarroako eta Iparraldeko beste udal, erakunde eta entitate batzuekin batera, Bertan proiektuan parte hartzen du. Proiektu horrek landa-eremuetako biztanleriaren zahartze progresiboaren erronkei eta hirigune nagusietatik urrun dauden landa-eremuetan zerbitzu publikoak eskuratzeko dauden zailtasunei heltzen die. Ekimen honek parte hartzen duten lurraldeen artean ezagutzak eta esperientziak trukatzeko foroak sortzea barne hartzen du, eta, beraz, aukera paregabea da Amasa edota Legarretako gure landa-inguruneko errealitateari nola aurre egin ikasteko.

Beatriz Unzue alkateak eta Xabat Laborde alkateordeak atzo Irurzunen (Nafarroa) egin zen foroan parte hartu zuten, Eusko Jaurlaritzako, Nafarroako Gobernuko, Iparraldeko Mankomunitateko eta Orozko, Urduña eta Arbizuko udaletako ordezkariekin batera; izan ere udalerri hauek, Amasa-Villabonarekin batera, landa-eremuan gizarte-interbentzioko proiektu aitzindari honetan parte hartzen dute, baserrietan bizi diren pertsonen bizi-baldintzak hobetzeko. Eremu hauetan bizi diren pertsonen portzentaia handi batek adin nagusia du eta oinarrizko zerbitzuetara heltzeko arazoak dituzte.

Bere hitzaldian, Beatriz Unzuek Amasa-Villabonako Udalak orain arte emandako pausoak azaldu zituen: "Programa informatiko baten bidez, baserri bakoitza Amasa-Villabonako mapan kokatzeko lehen diagnostikoa egin dugu. Tresna honen bidez, baserri bakoitzean bizi diren pertsonen datuak kontsulta ditzakegu. Beraz, badugu lehen oinarrizko informazioa lanean hasi ahal izateko ". Halaber, honako hau azaldu zuen: "gure adinekoekin beren etxebizitzetan harremanak dituzten kanpoko agenteak identifikatzen lan egin dugu. Adibidez, postaria, okina, ondoko baserriko bizilagun gaztea, etab. Agente horien lana izango da adinekoekin zuzeneko harremanetan egotea eta esku-hartzeren bat eskatzen duen egoera bereziren bat identifikatzen badute, gure gizarte-zerbitzuei jakinaraztea. Esan beharra dago hori guztia oraindik ezin izan dugula martxan jarri, bizi dugun pandemia-egoera honen ondorioz ".

Aipatu behar da udaleko Gizarte zerbitzuen saila 2018an hasi zela ekimen honetan parte hartzen, eta egungo udal-gobernuak lanean eta sakontzen jarraitzeko interesa erakutsi duela.

BERTAN proiektua, Europar Batasuneko funtsetatik finantzatzen da, eta lan komunitarioaren eta sektore anitzaren ikuspegia proposatzen du, erronkak diagnostikatuz eta lau lan-ardatzetan konponbideak proposatuz:

  • Eskualde barruko/eskualde arteko garraio egokitua, landa-eremuetako adinekoen erabateko gizarte-partaidetza eta zerbitzuetarako sarbidea hobetzeko.
  • Bizileku komunitario egokituak, etxe eta bizitegi arloen arteko trantsizioak, landa-eremuetako adinekoen bizi-kalitatea hobetzeko.
  • Zaintza komunitarioko formulak, zaintzailearen irudia eta familiako atseden-sistemak hobetzea barne (ordezkapen-zerbitzua).
  • Detekzio eta esku-hartze goiztiarreko sistemak, komunitatea mobilizatuz (parte-hartze aktibotik) eta teknologia sozialaren ekarpena barne (GIS).

Amasa-Villabonako udal-gobernua oso pozik agertu da Euskal Herri osoko erakundeekin batera proiektu aitzindari honetan parte hartu ahal izateagatik, eta oso positiboki baloratzen du beste esperientzia batzuetatik ikasteko aukera, aurrerantzean neurri zehatzak hartu ahal izateko Amasamendi, Goiburu, Legarreta eta abarretako landa-eremuetako biztanleei laguntzeko inolako diskriminaziorik izan ez dezaten eta zerbitzuak (publiko zein pribatuak) eskuratzeko aukera izan dezaten.

Hauek dira Amasa-Villabonako udalarekin batera proiektu honetan parte hartzen duten erakundeak:

Sakanako Garapen Agentzia, Agintzari, CIAS, Irurtzungo Gizarte Zerbitzuen Mankomunitatea, Orozko, Orduña eta Arbizuko udalak, Zabalduz Koop Elk, Communauté d’Agglomération Pays Basque (CAPB), Autonom’Lab, SASOIAK, Syndicat des Mobilités Pays Basque-Adour (SMPBA), Nafarroako Gobernua eta Eusko Jaurlaritza. 

 

IMG 20200925 112250

Hirigintza Batzordeak Larreako parkea estaltzeko proiektua onartu du

Honakoa beste aurrera urrats bat izan da, 2014an garatutako parte hartze prozesuaren ondoren, herritarren bozketa zuzenaren bidez hautatua izan zen proiektu hau behingoz errealitate bat izan dadin. 

Esan bezala, Antonio Lopez Sanchez arkitektoak osatutako "Rayuela" izeneko proiektu honek, herritarren babesa jaso zuen 2014an eta azken udal hauteskundeetan udal gobernua eskuratu zuen EH Bildu taldeak behin baina gehiagotan adierazi du proiektu hau burutzeko asmoa. Aipatu behar da, hasiera batean "Rayuela" proiektuak jasota zuen ingurunearen ber-urbanizazioa ez dela gauzatuko, onartu den azken proiektuak haur parkearen estalpea eraikitzea jasotzen du, inguruneko urbanizazioa orohar bere horretan (gaur egun dagoen bezala) geratuko delarik

Udal gobernuak oso garrantzitsutzat du proiektu hau egikaritzea, Villabonako herrigunean betidanik egon den gune estali gehiago edukitzeko beharrari eta herritarren eskaerari erantzuten baitio. Oraingoan badirudi pausoz pauso, hilabete gutxiren buruan lanak hasteko moduan egongo dela udala, izan ere, Hirigintza eta Ingurumen Batzorde Informatzailearen astearte honetako (irailaren 22an) bilkuran, proiektua ontzat eman eta onartzea erabaki zen. Udal arkitektoak proiektua aztertu ondoren, "aldeko iritzia" jasotzen duen txostena egin zuen. Beraz, ondorengo urratsa, proiektu honetako lanak zein enpresak egingo dituen zehaztea izango da eta horretarako, esleipen prozesu publiko eta irekiari hasiera emango dio udaleko kontratazio mahaiak.

Proiektuaren datu nagusiak:

  • Lekua: Larrea auzoko "Behe Nafarroa" izeneko parkea.
  • Estaliko den azalera: 31,43 m x 7,70 m: 242,01 m2.
  • Altuera: 5,19 m
  • Estruktura: Habeak, pilareak eta uhal metalikoak. Alde motzetan hormigoizko hormak.
  • Estalkia: Polikarbonatozko estalkia
  • Lizitazioaren oinarrizko aurrekontua guztira (BEZ barne): 174.176,61 €
  • Finantziazioa: Udal gerakina (gaur egun 1.373.198,60 euroko funtsa)

Adostasun politikorik ez

Hirigintza Batzordean ez zen erabateko adostasunik izan. Proiektuaren onarpen proposamenak EH Bildu eta PSEren aldeko bozkak izan zituen eta EAJ-PNVren kontrakoa.

EAJ-PNVko ordezkariaren esanetan, proiektua ez dago behar bezain beste partekatua eta ez du adostasun nahikorik, gainera momentu hau horrelako gastu bat egiteko ez dela aproposa gaineratu zuen. Adostasuna bilatzeko eta gune estalien inguruan dauden aukeren artean hitz egin eta negoziaziorako prest agertu zen EAJ-PNVko ordezkaria, baina ez zuen egokia ikusten orain Larreako parkea estaletzeko proiektua egitea. Era berean, EH Bilduri "rodilloa" pasatzea leporatu zion, EAJ-PNVrekin akordioak egiteari atea itxiz.  

EH Bilduko Xabat Laborde hirigintza zinegotziaren esanetan, bada garaia behingoz proiektu hau egiteko. 2014an egindako prozesu parte hartzailea zein herri galdeketa balorean jarri eta errespetatu beharrekoak direla gaineratu zuen. Proiektu honekin herriari emandako hitza betetzen dela azaldu zuen, proiektua EH Bilduk hauteskundeetara aurkeztu zuen udal-programan zegoen eta. Beraz, proiektu honek zilegitasun osoa eta herritarren babesa duela ondorioztatu zuen "orain arte herriari galdetu zaion proiektu bakarra" delako. Bestalde, Covid-ak udalaren jarduna ezin duela paralizatu eta honakoa herritarren eskaera historikoa dela defendatu zuen.

PSEko ordezkariak proiektua babestea eta aldeko bozka ematea erabaki zuen, bere ustez gune estali bat izatea oso garrantzitsua delako eta bere programan ere gune estali bat egitearena jasotzen zelako. EAJ-PNVri leporatu zion lau urtez zain egon izana eta zentzu horretan ezer ez egitea. Villabonan parke bat estaltzeko "edozein proiektu" babestuko zuela gaineratu zuen.

Azpikategoria

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.