05Martxoa2021

009.jpg
Zu hemen zaude: Albiste nabarmenak
Gislan prentsaurrekoa

Udalak etxebizitza politika berria garatuko du 2021etik aurrera

Julen Landa, Gislan Kooperatibako ordezkariak, gaur eguerdian prentsaurrean aurkeztu du Amasa-Villabonako metabolismo demografikoa eta etxebizitza beharren azterketa. Kooperatiba honek garatutako txostenari esker etxebizitza politika desberdinak diseinatzeko informazio baliagarria eskaini dio Amasa-Villabonako udalari.

Etxebizitza politika eraginkor bat diseinatu eta martxan jartzeko aukera

Gislan Kooperatibak garatutako lanari esker, Amasa-Villabonako udalak adierazle sozio-demografikoen eta etxebizitza parkearen datu base zabal bat du esku artean. Txosten horrek, gainera, etorkizunera begira proiekzio edo aurreikuspenak ere jaso ditu, adibidez, etorkizunean gure udalerrian zein etxebizitza behar egongo den. Ondorioz, udalak oinarri gisa erabiliko duen ezinbesteko tresna izango den egoeraren analisi eta diagnostiko zehatz bat du orain.
Azterlan honekin urrats garrantzitsu bat eman du Amasa-Villabonako udalak, horrela, etxebizitzaren problematikari heldu, eta etxebizitza politika eraginkor bat diseinatu eta martxan jarriko baitu.

Hainbat erronka identifikatu dira

• Gazteak Amasa-Villabonan errotzea. Bizi dugun biztanleriaren zahartze prozesuak, gazteak herrian mantentzearen eta beren emantzipazioa herrian bertan egitearen garrantzia biderkatu du. Bizi dugun egoeran, ezin dugu onartu herriko gazteak beste herri batera joatea, gurean etxebizitza lortzeko dituzten zailtasunengatik.

• Alokairuaren eskaintza zabaltzea, zentzuzko prezioetan. Alokairuen eskaintza apala eta ordaindu beharreko prezio altuegia arazo orokorra da Euskal Herri osoan, baina beste erakunde edo administrazio publikoek ez badute arautzen, udaletik egin beharko dugu ahalegina. Alokairu gehiago eta merkeagoak izatea ezinbestekoa da.

• Etxebizitza hutsen merkaturatzea. Amasa-Villabonako etxebizitzen %10a hutsik dago eta udaletik etxebizitza horiek erabilgarri egon daitezen eta jendez bete daitezen eragin behar da. Orain arte hartutako neurriek etxebizitza hutsei zerga errekargua ezartzearena kasu, ez dute Udalak nahi lituzkeen emaitzak eman.

• Bizikidetza unitateen gehikuntzari erantzutea. Amasa-Villabonako bizikidetza unitateen kopuruak gora egingo du datozen urteetan eta bizikidetza unitate horiek gero eta txikiagoak edo pertsona gutxiagok osatutakoak izango dira. Egoera horri erantzuteko, neurri batean etxebizitza eskaintza zabaldu edota moldatu beharko da.

Udalak etxebizitza politika aktibo bat garatzeko konpromisoa

Erronka hauei erantzuteko Amasa-Villabonako udalak 2021. urtean etxebizitza politika aktibo bat garatzen hasteko konpromisoa hartzen du. Helburu eta neurri zehatzak jasoko dituen plangintza bat osatuko du, kronograma eta ekintza plan batekin.

Udal gobernu honentzat etxebizitzaren gaian dituen erronkei heltzea oso garrantzitsua da eta lan-ildo estrategiko gisa definitzen du. Etxebizitza politika aurrerakoi, eraldatzaile eta eraginkorra osatu eta garatu nahi du, gauzak aldatu daitezen eta etxebizitza duina izatea benetako eskubidea izan dadin.

Gislan Kooperatibari Udalaren esker ona

Amasa-Villabonako udalak eskerrak eman nahi dizkio Gislan Kooperatibari, azken hilabeteetan egindako lan guztiagatik eta eskainitako informazio baliagarri guztiagatik.

 

Amasa-Villabonako metabolismo demografikoaren eta etxebizitza parkearen azterketa

alkateak-mugimendua

Eskualdeko osasun mahaia osatzeko deia egin dute Tolosaldeko 25 alkatek

Zain egon gabe, proposamen zehatzak egiteko eta erabakiak hartzeko garaia dela aldarrikatu dute

Gaur goizean Beatriz Unzue, Igor Zapirain eta Arantxa Irazusta, Amasa-Villabona, Ibarra eta Alegiako alkateek prentsaurrekoa eskaini dute Ibarrako udaletxean eskualdean osasun publikoaren inguruan dagoen gatazkaren inguruan. Eskualdeko alkateek osatu duten mugimenduaz, alkate hauek osatutako proposamenen berri eta eskualdeko mahaia osatzeko deialdiaz aritu dira.

Honakoa da hiru alkate hauek, Tolosaldeko 25 alkateren izenean plazaratu duten oharra:

2020ko otsailaren 17an Tolosaldeko osasun publikoaren egoerak kezkatuta 25 alkatek akordio bat sinatu genuen. Bertan, parte-hartze prozesu bat martxan jartzeko eskatu genion Jaurlaritzari eta honen harira, eragile, udal eta Jaurlaritza parte izango ziren mahai bat osatzeko.

Zortzi hilabete pasa dira jada ordutik, COVIDak markatutako zortzi hilabete zail. Argi ikusi dugu COVID-aren krisiak aurretik genuen osasun egoera larritu eta azaleratu besterik ez duela egin. Larunbateko manifestazioan garbi gelditu zen Tolosaldeko herritarrek aspalditik eskatzen dutena, eskualdean dagoen haserre eta ezin egona agerian utziz.

Mugimendu hauen bueltan, azken egunetan Tolosaldeko alkate batzuen aldebakarrekotasun jarrerak harrituta utzi gaitu. Ez zaigu iruditzen protagonismo bila aritzeko gaia eta garaia denik. Eskualde bezala jokatzeko momentua da, guziak noranzko berean lan egitekoa. Denak ados gaude herritar guztien osasun beharrak bermatuko dituen Ospitale Publiko bat behar beharrezkoa dugula. Horretan denak ados egonda, erabaki dezagun denon artean zer nolako osasun arreta nahi dugun Tolosaldean.

Ez dugu uste zain egoteko garaia denik, proposamen zehatzak egiteko eta erabakiak hartzeko garaia baizik. Argitu beharreko puntuei heltzeko garaia da:

  • Tolosaldeko osasun arretaren definizioa.
  • Asuncioneko langileen etorkizuna.
  • Ospitale berriaren kokapena.
  • Prozesu guzti hau aurrera eramateko epeen zehaztapena

Alkate Mugimendutik, Asunciongo langileen etorkizunaren inguruan eta ospitale berriaren kokapenaren inguruan proposamen zehatzak ditugu.

Esaterako, Tolosaldeko Ospitale publikoa eraikitzeko leku posible bezala Apattako bigarren fasea proposatzen dugu. Industriagune izatera bideratutako lurrak diren arren, egungo industriaren egoera kritikoa kontuan hartuta eta eskualdeak duen behar historiko hori balantzan jarriz, erabat zentzuduna iruditzen zaigu, industriara bideratutako lur horiek eskualderako osasun zerbitzua emango duen ospitale publiko batera bideratzeko aukera aztertzea.

Hala ere, garbi utzi nahi dugu hauek proposamenak baino ez direla. Erabakiak guztion artean adostuak izan behar dute, benetako erabaki gunea Tolosaldeko osasun mahaiak izan behar du eta hori horrela izanda, guk bertara eramango ditugu gure proposamenak. Mahai horretan adostu beharko da kalitatezko osasun arreta bermatzeko erarik egokiena zein den.

Hau garbi utzita, udal, gizarte eragile eta sindikatuekin erronda bat irekitzera goaz datozen asteetan. Bada garaia Eusko Jaurlaritzarekin lanketarako ahal den ordezkaritza zabal eta anitzena osatzeko eta eskualdetik ahots bakarra izateko.

Alkateen Mugimendutik argi adierazi nahi dugu Tolosaldeko osasun mahaia osatzea premia handikoa dela.

DIRULAGUNTZA COVID INBERTSIOAK

Covid-19ari aurre egiteko dendari eta ostalariek egin dituzten inbertsioak arintzeko dirulaguntzak emango ditu udalak

Gaur argitaratu dira Gipuzkoako Aldizkari Ofizialean Amasa-Villabonako udalak martxan jarriko duen diru laguntza berri honen oinarriak: GAO U-15. Covid laguntzak Villabona

Covid-19ari aurre egiteko merkatari eta ostalariei laguntzeko programa hau Gipuzkoako Foru Aldundiari dagokio nahiz eta diru banaketa udalen bitartez egingo den, tokian tokiko erakundeak zehaztutako baldintzen arabera. Amasa-Villabonako udalak 25.956 euro jaso ditu. Dirulaguntza hauetarako oinarriak eta deialdia pasa den urriaren 7an onartu ziren 2020/534 Alkatearen Dekretu bidez. 

Azalpena

Herriko dendari eta ostalariek, Covid-ak exijitzen dituen segurtasun eta osasun protokoloak bete ahal izateko, lokalak eta lan egiteko moduak egokitu behar izan dituzte, horretarako hainbat inbertsio eginda. Gastu horiek arintzera datoz ez-ohiko dirulaguntza hauek. Ez dira diruz lagunduko maskarilla, gel eta antzekoetan egindako gastuak baina bai langile eta bezeroen babes eta segurtasunerako ekipamendu bereziak eskuratzeko eta lokala egokitzeko inbertsioak. 

Establezimenduek bete beharreko baldintzak

Programa honen dirulaguntzen onuradunak beren kontura lanean diharduten pertsonak edo autonomoak eta Villabonako enpresak edo elkarteak izan daitezke, eta baldintza hauek bete beharko dituzte:

  • Villabonan kokatutako establezimendua edukitzea.
  • Villabonako Udalarekin zorrik ez edukitzea.
  • Villabonan kokatutako establezimenduaren jarduera nagusia publikoa bertatik bertara artatzekoa izatea.
  • Covid-19 pandemiagatik publikoa artatzearekin lotutako zerbitzua emateko higiene edo eta babes neurri berriak ezarri behar izatea.

Diruz lagunduko diren jarduerak

Diruz lagundu ahal izango dira inbertsioak eta ekipamenduak, baita inbertsioak gauzatzeko azterketak ere, jarduera ekonomikoak Covid-19 edo koronabirusari aurre egiteko prestatzera bideratuak badaude. Besteak beste, honako hauek izango dira:

  • Lokalak eta laneko moduak egokitzea.
  • Segurtasun eta osasunaren irizpideak/protokoloak betetze aldera, merkataritza edo ostalaritza lokalak moldatzeko inbertsioak eta ekipamendua.
  • Laneko moduak egokitzeko inbertsioak eta ekipamendu erosketak.

Diruz lagundu daitezkeen jarduerak 2020ko martxoaren 14tik aurrera egin beharko dira (fakturaren data hartuko da kontuan) eta eskaera aurkeztu arte.

Ez da diruz lagunduko material kontsumigarrien erosketa, hala nola, gel hidroalkoholikoak, maskarak…

Dirulaguntzaren zenbatekoa

Programa honek diruz lagun daitekeen gastuaren % 100 finantzatuko du, gehienez 1.500 euro izanik establezimendu bakoitzeko. Establezimendu bakoitzeko dirulaguntza bakarra emango da.

Dirulaguntza honetarako ezarritako finantziazioa nahikoa ez bada egindako eskaera guztiei %100ean erantzuteko, dirulaguntzak onartutako gastuaren araberako proportzioan murriztuko dira, eskaera guztiei erantzun ahal izateko.

Eskaera egiteko lekua

Eskaerak udaleko Herritarren Arreta Zerbitzuan (udaletxeko behe solairuan) aurkeztu beharko dira.

Eskaera orriak establezimenduaren titularrak edo legezko ordezkariak aurkeztu beharko ditu, udalaren webgunean (www.villabona.eus) argitaratuko den eskaera ofizialaren ereduan:

ESKAERA EGITEKO INPRIMAKIA

Aurkeztu beharreko dokumentuak

  1. Eskaera orria beteta.
  2. JEZ alta ziurtagiria Villabonan, txikizkako merkataritza eta ostalaritzaren sektoreetako epígrafe ekonomikoetan.
  3. Eskatzailearen eta, hala badagokio, ordezkariaren NAN-aren kopia.
  4. "Memoria" izeneko eredua, Covid 19ari aurre egiteko eta jarduera ekonomikoa horretara prestatzeko zuzendutako jardueren memoria: MEMORIA EREDUA
  5. Dirulaguntzaren helburua diren gastuen fakturen zerrenda, ondorengo taula beteta: FAKTURAK JUSTIFIKATZEKO FITXA Egindako gastuen fakturen kopiak ere aurkeztu beharko dira, banku ordainagiriarekin batera.

* 2. ataleko dokumentua ez da aurkeztu beharko, baldin eta Udalarengatik «Covid-19 koronabisuraren bilakaerak eragindako galerak arintzeko txikizkako merkataritza eta ostalaritza establezimenduentzako laguntza ekonomikoa» jaso bada.

Eskaerak aurkezteko epea

Eskaerak aurkezteko epea, 2020ko azaroaren 30ean amaituko da.

Azpikategoria

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.