22Urtarrila2021

003.jpg
Zu hemen zaude: Albiste nabarmenak
euskararen eguna 2020

Udalaren Adierazpena Euskararen egunean

Amasa-Villabonako udalbatzak bi erakunde adierazpen onartu zituen euskararen egunerako, bata udal gobernuak osatu eta proposatutakoa eta bestea EAJ-PNV alderdiak aurkeztutakoa (bigarren hau EUDEL-en alderdi politiko guztiek adostutako testu bera da). Bi adierazpenak aho batez onartu ziren. Udal gobenuak aurkeztutako adierazpenaren bidez udalak 16 konpromiso hartzen ditu euskara sustatzen jarraitzeko eta euskararen normalizazioan aurrera urrats sendoak emateko.

Honakoa da udal gobernuak aurkeztu eta udalbatzak onartutako adierazpena:

Erakunde Adierazpena Euskararen Eguna dela eta

ZIOA

Eusko Ikaskuntzak 1949. urtean Euskararen Nazioarteko Eguna abenduaren 3. egunarekin ospatzea erabaki zuenetik, urteak joan urteak etorri, euskararen hiztun komunitateak lortu du, besteak beste estandarizazio prozesuari (1968) eta euskaltzaleen zein euskalgintzako eragileen bultzadari esker, euskara hilzoritik ateratzea.

Hala ere, urte luzetan izandako euskaltzale eta ekintzaile askoren ahaleginak alferrikakoak gerta daitezke azken urteotan euskarak hainbat arlotan jasandako atzerakada dela medio.

Joan den urtean, inoiz ez bezala euskaldunok berariazko erakundeak geneuzkala genion; Araba, Bizkaia eta Gipuzkoan, alde batetik, Lapurdi, Nafarroa Beherea eta Zuberoan, bestetik, eta Nafarroa Garaian, azkenik. Egia da, baina era berean hizkuntza politika bateraturik ez geneukala salatu genuen eta, tamalez, hizkuntza politika bateraturik izan gabe jarraitzen dugu.

Urte honetan, zoritxarrez, Covid-19 pandemiak mundu osoa erasan du. Hizkuntza gutxituek ere pairatu dituzte pandemia global honen ondorioak. Euskara zokoratua eta, kasu zehatz batzuetan, ezabatua ere izan da. Euskal Herriko edo euskararen lurraldeko erakunde publikoek, oro har, pandemiaren lehentasunezko izaera argudiatuta, euskararen erabilera bigarren maila batera eraman dute, euskararen hiztun komunitateari bizkarra emanez eta urteetan egindako lana arriskuan jarriz.

Covid-19a agertu zenetik, euskararen egoerak atzerakada nabarmena izan duela ohartarazten dugu. Hezkuntzan, non ikasle askok euskararekiko zeukaten eremu bakarra, eskola, galdu duten. Hedabideetan, non euskara lotsagabeki zokoratua eta baztertua izan den. Kulturan, non ikuskizunetan eta sortzaileen lanen hedapenean, euskararen hiztun komunitatearen haustura eta sakabanaketa areagotu den. Administrazioetan, non Covid-19ak eragindako itxialdian zehar administrazio publikoen aldetik euskararen erabilera zokoratu den. Badirudi, euskarak ez duela larrialdi egoeratarako balio.
Oraindik ez dakigu gure hizkuntzaren egoera noraino okertu den, eta oraindik gehiago okertu daitekeela dirudi. Hori horrela, gure hizkuntzak jasandako kalteak zeintzuk eta zenbatekoak diren aztertzea beharrezkoa da.

Horregatik, guztiagatik, aurtengo Euskararen Nazioarteko Egunari (abenduak 3) begira euskararen hiztun komunitateak, gure hizkuntza biziberritzeko konpromisoa indartu behar du. Ildo horretan, erakunde publikoek euskaldunon hizkuntza eskubideak errespetatuak izan eta osotasunean garatuak izan daitezen, ahalegindu behar dugu.

Herri mugimendua izan da, eta izan behar du, euskararen normalizazioaren oinarri eta bidelagun: Euskalgintzan aritzen diren herritarrak, Euskararen Gizarte Erakundeen Kontseilua, Galtzaundi Tolosaldeko euskara elkartea, AEK, Topagunea, Euskal Herrian Euskaraz etab. Pandemiaren eraginez euskararen aldeko hainbat ekimen (Korrika, Nafarroa Oinez, Ibilaldia, Durangoko Azoka etab.) bertan behera uzteak, edota euskarazko kultur ikuskizunak eta ekitaldiak egiteko izan diren zailtasun handiak, kolpe latza izan dira euskararen biziberritze prozesuarentzat. Egoera honetan agerian geratu da herri mugimendua eta bere bultzada ezinbestekoak direla.

Aurtengo Euskaraldiaren ezaugarri bereizgarria Arigunearen ideia da. Ariguneek, edo euskaraz aritzeko guneek, euskaraz hitz egiteko aukera bermatzen dute uneoro, izan entitate barruan edo izan entitateak herritarrekin duen harremanean. Horrek izan behar du gure aurtengo xedea eta eginkizuna; euskarari, euskararen hiztun komunitateari, bizitzeko funtzioak eta eremuak zabaltzea eta berriak eranstea.

ADIERAZPENA

Hori horrela, Amasa-Villabonako udalak, honako konpromisoak hartzen dituela adierazten du 2020ko euskararen nazioarteko egunaren testuinguruan:

  1. Covid-19 pandemiaren krisiak euskararen normalizazioan sorrarazitako kalteak ebaluatu eta kalte horiei aurre egiteko neurriak hartzea, Euskaran ados! mahai parte hartzailearen baitan.
  2. Amasa-Villabonako udala urte osoan zehar Arigunea izatea. Euskara izango da udalaren eta udal langileen ohiko hizkuntza eta udalak herritarrekin zein beste erakundeekin edukiko dituen harremanak euskaraz (gutxienez) izango dira.
  3. Udalak egingo dituen kontratuetan hizkuntza-irizpideak zehaztea eta ezartzea.
  4. Kontratazioetan, legeak baimentzen duen neurrian, euskara ziurtagiriak (Bikain eta Bai Euskarari, besteak beste) kontutan hartzea.
  5. 2021-2022 epealdirako Euskararen Sustatzeko Ekintza Plana (ESEP) osatzea eta martxan jartzea.
  6. Udalak, euskaraz diren hainbat tresna sustatzea, hala nola softwarea eta oinarrizko aplikazioak euskaraz, astialdirako IKT produktuak, .eus domeinua eta euskararen erabilera interneten.
  7. Euskarazko toki-komunikabideekin urte anitzeko hitzarmenak sustatzea, hedabide hauen jasangarritasun ekonomikoa eta egonkortasuna bermatzeko.
  8. Euskararen erabilera eta presentzia bermatzea erabiltzen ditugun komunikabide guztietan.
  9. Kirolaren euskalduntze-bidean lan egitea, federazioekin eta tokiko klubekin elkarlanean.
  10. Gazteentzako euskarazko aisialdi-zerbitzuak sustatu eta zabaltzea.
  11. Familia-eremuetan euskararen erabilera eta transmisioa sustatzen jarraitzea.
  12. Euskara ikasteko martxan dauden laguntzak mantentzea, euskara ikastea doakoa izango dela bermatuz.
  13. Enpresetan euskararen erabilera normalizatzeko ekimenak aktibatzea, euskara laneko eta zerbitzuetako hizkuntza izan dadin.
  14. Jarduera arau-emailea garatzea, enpresetan euskara erabiltzeko planak indarrean jartzeko.
  15. Eremu guztietako eragileekin (hau da, enpresa-elkarteekin, sindikatuekin, gremio-elkarteekin, merkataritza elkartearekin eta beste hainbat erakunderekin) akordioak bilatzea, euskararen normalizazioa bultzatzeko konpromisoa har dezaten.
  16. Herriko gizarte eragile eta euskalgintzarekin dugun elkarlanari eustea eta ahal bada, sendotzea.

 

Kontsumo bonoak aurkezpena.2

Ostiralean hasiko da Merkataritza Bonoen II. kanpaina

Gaur goizean Villabonako udaletxearen kapoaldean egindako agerraldi publikoan aurkeztu dira herriko merkataritza bultzatzeko ekimen berri honen xehetasunak. Agerraldian Beatriz Unzue alkateak eta Xabat Laborde eta Arantxa Lopez zinegotziek parte hartu dute, Tolosaldeko merkataritza teknikaria ere parte hartzekoa zen baina azken orduko arazoengatik ezin izan du agerraldira gerturatu. 

Beatriz Unzue alkateak aurkeztu ditu Bono kanpaina honen ezaugarri nagusiak:

KONTSUMO BONOEN II. KANPAINA

Amasa-Villabonako udalak, herriko merkataritza sektorea bultzatzeko kanpaina berri bat abiatzea erabaki du. Helburu nagusia, abenduan batez ere eguberrien testuinguruan egiten diren erosketa bereziak Amasa-Villabonako establezimenduetan egitea sustatzea da, modu horretan herriko saltokiak lagunduz.

Udalak guztira 32.000 euroko inbertsioa egin du ekimen hau garatzeko. 30.000 euro bonoak finantzatzeko eta 2.000 euro kanpainaren gastuetarako (inprenta, diseinua...). Inbertsio honekin, guztira 1.500 bono-txartel eta 10.500 bono indibidual argitaratu eta zirkulazioan jarriko dira. Establezimendu bakoitzak 30 bono-txartel izango ditu bezeroen artean saltzeko, bonoak saltoki guztien artean modu parekidean banatu baitira.

Kontsumo bono kanpaina honen xehetasunak Oria Merkatarien Elkartearekin adostu ditu udalak eta berrikuntza ugari ditu ekainean garatutako kanpainarekin alderatuta. Berrikuntza aipagarriena, oraingoan herriko establezimendu guztiek parte hartu ahal izan dutela da, baita zerbitzuak (ile apaindegiak, fisioterapiak...) eta elikagaiak saltzen dituzten saltokiak (arrandegiak, okindegiak, harategiak...) ere.

50 establezimendu
Establezimenduek astebeteko epea izan dute izena emateko eta guztira 50 establezimenduk erabaki dute kanpaina honetan parte hartzea.

Epea edo iraupena
Kontsumo bonoak abenduaren 4tik urtarrilaren 5era eskuratu eta erabili daitezke. Urtarrilaren 5etik aurrera baliorik gabe geratuko dira.

Bonoen ezaugarriak
30 euro ordainduta 50 euroko balioa duen bono-txartel orri bat eskuratuko da. Beraz, bono-txartel bakoitzarekin, erosleari 20 euroko ekarpena egingo dio udalak. Bono-txartel orri horrek 7 bono indibidual izango ditu: 10 euroko hiru bono eta 5 euroko lau.

Non eskuratu daitezke bonoak?
Saltokietan bertan erosi behar dira. Bonu-txartel bakoitza saltoki edo zerbitzu bati dagokio. Hau da, establezimendu bakoitzak bere bono propioak izango ditu, eta dendaren izenarekin identifikatuta egongo dira. Bonoak soilik erositako establezimendu horretan erabili daitezke eta herritar batek bono-txartel bakarra erosi dezake establezimendu bakoitzean.
Herritarren nahi adina establezimenduetan eros ditzakete bono-txartelak eta eroslea edozein herritakoa izan daiteke, ez da beharrezkoa Amasa-Villabonakoa izatea.

Erabilera baldintzak
Egiten den erosketaren zenbatekoa bonoaren balioa baino txikiagoa bada, diferentzia ez da eskudirutan itzuliko. Bonoak ezingo dira diruagatik trukatu.

Amasa-Villabonako udaletik, bonoak eskuratu eta erabiltzeko deia egiten diegu herritarrei eta eguberrien bueltan egiten diren erosketak herrian bertan egitera animatzen ditugu.
Zorionez, Amasa-Villabonan denda eta saltoki eskaintza oso zabala dugu, era guztietako produktuak eskuratu ditzakegu etxetik gertu, eta batez ere bertako dendarien gertuko eta kalitatezko arretaz gozatu dezakegu.

Beraz, erabili bonoak eta erosi herrian, abenduan eta urte guztian!

Hauek dira kontsumo bonoen bigarren kanpainan parte hartu duten 50 establezimenduak:

  • Albizu kirolak.
  • Amane.
  • Amasa okindegia.
  • Ander's gallery.
  • Ane denda.
  • Arindu fisioterapia.
  • Baratz denda.
  • Basajaun liburu-denda.
  • Boutique MP.
  • Brunila.
  • Duna oinetakoak.
  • Eguzkilore denda.
  • Eizmendi anaiak.
  • Eizmendi ileapaindegia.
  • Electricidad soto.
  • Errezil pentsuak.
  • Farmazia Berria.
  • Fruteria Villabona.
  • Galerias M.J.
  • Garintza mertzeria.
  • Gema loredenda.
  • Gorostidi burdindegia.
  • Gurrutxaga.
  • Ifni pelu ileapaindegia.
  • Iruma ileapaindegia.
  • Javier Iraola harategia.
  • Joyeria Relojeria CID.
  • Kanela arropa denda.
  • Kaori faktoria.
  • Karlis argazki denda.
  • Kau XXI informatika.
  • Kazetaria.
  • Labezain Arroa Kalea.
  • Labezain Nagusia Kalea.
  • Lema arraindegia.
  • Lider gozotegia.
  • Mariaje Arte y Compl. Pelu.
  • Malva.
  • Musturinea harategia.
  • Opticalia Bronte.
  • Peluqueria Mixta Mujika.
  • Pepi janari denda.
  • Rep. de Calzado Azkar.
  • Sahatsa belar-denda.
  • Tinta inprimategia.
  • Titare mertzeria.
  • Ugalde oinetakoak.
  • Villabona Optica audiol.
  • X los pelos.
  • Zubimusu.
Foto 6web

Eskailera berriak Olaederra kiroldegiko kantxan

Udalak kiroldegiko kantxarako eskailera berriak erosi ditu, larrialdi irteeren arazoa konpondu eta harmailetako edukiera handitzeko

Amasa-Villabonako udalak inbertsio berri bat gauzatu du Olaederra Kiroldegiko kantxan zeuden hainbat arazori aurre egiteko. Izan ere, orain arte kantxako harmailetako larrialdi irteerek dituzten ezaugarriak kontuan izanik, instalakuntzaren ebakuazio planak harmailen edukiera 160 pertsonara murriztu zuen, nahiz eta bertan ia 500 eserleku egon. Egoera honek, Kiroldegiko kantxan egin daitezkeen ekitaldi edo emanaldietarako muga handia suposatzen zuen. Inbertsio honek arazo honi irtenbidea eman dio eta hemendik aurrera, harmailak bere osotasunean erabili ahal izango dira.

Ikusleen ebakuaziorako lau eskailera berri 

Inbertsio honen bidez udalak lau eskailera erosi eta ezarri ditu, harmailak eta kantxa konektatuz. Horrela, ikusleek harmailetatik kantxara jaisteko aukera izango dute, kantxan aurkitzen diren larrialdi irteeretara heldu ahal izateko.

Eskaileren azalpen teknikoa: Hormigoizko harmaila aurrealdetik husteko neurrira egindako eskailera-unitatea. Zortzi altuerako eskailerak (sei maila gehi dekansiloa). Profil angeluzuzenean eginak 100x60x2mm, tramex-mailak, hodi karratuko baranda sinplea, profil angeluarreko gidak hegalkin-sabaian, lurzorura finkatzeko pasagailuak, akabera inprimazio sintetikoan. Publikoa ebakuatzeko orientazioa albokoa izango da, eta sistema osoa jasota geratuko da harmaila azpiko zuloan erabiltzen ez denean.

14.115,65 euroko inbertsioa

Guztira 12.995,40 euroko (BEZ barne) inbertsioa egin du udalak eskilara hauek diseinatu eta erosteko eta beste 1.120,46 euro (BEZ barne) bideratu ditu orain arte harmeiletan zeuden barandilen egokitzapena egiteko. Eskailerak Hobby Kirolak S.L. enpresak diseinatu eta ezarri ditu.

Azpikategoria

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.