16Urria2019

001.jpg
Zu hemen zaude: Albiste nabarmenak Amasa-Villabonako herriak omenaldi beroa eskaini zion Iraitz Arrospideri

Amasa-Villabonako herriak omenaldi beroa eskaini zion Iraitz Arrospideri

IMG 9299 tokikom 700x700

Iraitz Arrospidek omenaldi jendetsu eta beroa jaso zuen Villabonako Errebote plazan, joan zen irailaren 1ean, Errumanian, 50 kilometroko lasterketan munduko txapeldun geratu ostean. Esker ona, umiltasuna eta irribarre zabala erakutsi zituen korrikalari billabonatarrak eta bertaratutako herritarrek txalo zaparrada beroak eskaini zizkioten behin baino gehiagotan herritarren aldetik.

Haurren kros arrakastatsua

12 urtetik beherako haurren lasterketarekin ekin zitzaion arratsaldeko jaialdiari. Haur askok hartu zuen parte Errebote plaza abiapuntu eta helmuga izan zuen lasterketa laburrean. Haurrak urduri eta pozarren agertu ziren, 50 kilometroko munduko txapeldunaren atzetik korrika egiteko ohorearen aurrean. Behin guztiak Errebote plazara iritsita, parte-hartzaileen artean Iraitz Arrospidek berak sinatutako hiru bisera eta hiru kamiseta zozketatu zirten. Saria egokitu zitzaien haurren irrifarrea ikustekoa izan zen.

Omenaldi ekitaldi herrikoia

Gorka Kamio Amasa-Villabonako Udaleko kirol zinegotziak aurkeztu zuen omenaldi-ekitaldia. Oihana Iguaran bertsolariak bi bertso hunkigarri abestu zizkion, jaioterria beti gogoan izatea nahiz bere lorpenak goraipatuz eta bere pausoak jarraituko ditugula esanez. Oinargi dantza taldeko lau dantzarik, tartean Iraitz beraren lehengusuak, aurreskua dantzatu zioten eta, besteak beste, Udal ordezkariek, Zunbeltz nahiz Urkamendi elkarteetako kideek edota Aritz Garin, Leire Lizarralde eta Ander Etxeberria korrikalariek hartu zute parte ekitaldian.

Beatriz Unzue Amasa-Villabonako alkateak ere munduan barrena beti Amasa-Villabona berekin eramatea eskertu zion eta munduko txapelduna herrian eduki arren, herriko beste kirolariak ere gogoan izan ditula, beraien ibilbide eta lorpenengatik omenduak izan beharko luketenak. "Herri txikia gara, baina bizitasun handikoa. Gauza txikietatik hasi eta iristen dira lorpen handiak. Ziur nago zure ibilbidea ez dela erraza izango, Iraitz: Lana, familia, entrenamenduko ordua asko... Karrera txikietatik hasi eta 50 kilometro burutu arte! Non ote dauka limitea Iraitzek?", galdegin zuen. Iraitzen hurrengo erronketaz ere aritu zen alkatea, "Behobia-Donostia, Valentziako Maratoia eta Joko Olinpiarretarako sailkapena lortzea. Gu hor egongo gara zure ibilbidea jarraituz, gure indarrak hor izango dituzu karrera guztietan. Guk ere amesten dugu Iraitz Arrospide Joku Olinpiar horietan ikustea Euskal Herria ordezkatuz. Berriz ere zorionak Iraitz eta zorterik onena zure erronka berrietan".

Iraitz Arrospideren hitz hunkigarriak

Errebote plazan bildutakoen txaloen ostean, Iraitzek berak hartu zuen hitza. Jendaurrean hitz egitea zaila egiten zaiola azaldu arren, oso hizketaldi polita eskaini zuen, umiltasunetik. "Lehenik eta behin eskertu zuei guztioi plaza bete izana. Ez nuen espero hain denbora gutxian horrelako ekitaldia sortzea. Niretzat oso-oso berezia da. Herrikoa sentitzen naiz, billabonatarra; eta nire herrian horrelako ekitaldi bat egitea sekulakoa da eta bizi guztian gogoratuko ditut egun hau eta une hauek". Egun Sheffielden (Erresuma Batua) bizi bada ere, jaioterria, Amasa-Villabona, gogoan duela adierazi zuen, "Villabonak niretzat lotura eskola eta lagunekin du. Gaur batez ere hemen dauden nire lagunei eskaini nahi diet eta, dakizuen bezala, orain duela bi urte lagun batek alde egin zigun eta kuadrillaren eta nire izenean berari eskaini nahi genioke. Eskerrik asko guztioi. Udaletxeari, lagunei, billabonatar guztioi. Bide honetan jarraituko dugu". Joko Olinpikoen inguruan mintzatu zen Iraitz Arrospide, bere hizketaldiaren amaieran. "Joko Olinpikoak aipatzen ditugu behin eta berriz eta esan nahi nuke benetan zaila dela helburu hori. Egia da helburuak jarri behar direla eta helburuek laguntzen digutela hobetzen eta aurrera egiten. Benetan helburu zaila da eta saiatuko naiz, baina jakinda lortzen ez badugu ere herriaren maitasuna badaukadala, argi geratu den bezala. Beraz, eskerrik asko guztioi hona etortzeagatik. Animo eta aurrera!".

Dantzarien emanaldi berriarekin eta txalo beroz lagunduta amaitu zen ekitaldia. Lagunez, etxekoez eta herritarrez inguratuta, batarekin eta bestearekin hizketan aritu zen korrikalari billabonatarra. 

Zu hemen zaude: Albiste nabarmenak Amasa-Villabonako herriak omenaldi beroa eskaini zion Iraitz Arrospideri
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.

Buletinera harpidetu