Albisteak
- 2020 Otsaila 05
Asteburuan emakume pilotariak izango dira protagonista
Amasa-Villabonako udalak emakumeen kirola sustatzeko hainbat ekimen antolatuko ditu 2020. urtean zehar. Genero berdintasunaren aldeko dinamika oso baten baitan, kirolean (ia kirol guztietan) emakumeek pairatzen duten bazterketari aurre egitea elementu garrantzitsua izango da. Zentzu honetan, asteburu honetan gure herriko bereizgarri garrantzitsuenetakoa den pilota kirolean ere, berdintasunaren aldeko sentsibilizazioan eragitea izango da antolatu diren ekimenen helburua.
- 2020 Urtarrila 29
Parte hartze prozesuaren eta herri galdeketaren aurkezpena asteazkenean Subijanan
Amasa-Villabonako udalak, datozen hilabeteetan garatzeko asmoa duen herritarren parte hartze prozesua eta herri galdeketa aurkezteko batzar irekia antolatu du:
Urtarrilak 29 asteazkena, 19:00etan Subijana etxean
Batzar honetan udal gobernuak osatu duen proposamena aurkeztuko da eta helburu nagusia herriko elkarteen zein norbanakoen ekarpenak jasotzea izango da. Horretarako bigarren batzar ireki bat deituko da otsailean.
Parte hartze prozesu horren bidez udalak herritarren esku utzi nahi du 400.000 euro zertara bideratuko diren erabakitzea. Lehen aldia izango da Amasa-Villabonan tamainako prozesu bat garatuko dena eta oso garrantzitsua izango da prozesu hori adostua, gardena eta erabat demokratikoa izatea. Horregatik, udalarentzat oso garrantzitsua izango da herritarren eta herriko eragileen inplikazioa lortzea.
- 2020 Urtarrila 23
1936-1945 urteen artean Nazien kontzentrazio eremuetan egondako herritarrei omenaldia Udaleko Memoria eta Bizikidetza Batzordearen eskutik
Urtarrilaren 27an, Holokaustoaren biktimak oroitzeko nazioarteko egunean, udaleko Memoria eta Bizikidetza Batzordeak (udaleko alderdi politiko guztien adostasunarekin) Nazien kontzentrazio eremuetan egondako Amasa-Villabonako bederatzi herritarrei omenaldi ekitaldi bat antolatzea erabaki du.
Ekitaldia, urtarrilaren 27an, astelehena, 18:00etan Berdura plazan izango da.
Ekitaldi honen helburua, nazismoak eragindako giza eskubideen urraketa latzak, sarraskiak eta gizateriaren kontrako krimenak salatzeaz gain, Amasa-Villabonako bederatzi herritar hauek eta beren senideek demokraziaren eta askatasunaren alde jarduteagatik pairatutako sufrimendu bidegabea aitortzea izango da.
