24Abuztua2019

011.jpg
Zu hemen zaude: Albisteak

Kategoria: Nabarmenak

IMG 20190820 141237 032

Oriamendi, Errota eta Arroa auzoetan ur-hornikuntza sarea eraberritzeko lanak hasi dira

Proektua Gipuzkoako Ur Kontsortzioak (Gipuzkoako Urak) burutu du, lanek guztira 20 astetako (5 hilabete) iraupena izango dute eta 390.448,85 euroko aurrekontua dute. Kontratazio lehiaketa irabazi ondoren, obra Sasoi Eraikuntzak S.L. enpresak gauzatuko ditu.

Villabonako auzo hauetako ur-hornikuntzarako hoditeria aldatu eta hodi berriak ezartzeaz gain, saneamendu sarean ere hobekuntzak egingo dira. Gaur egungo hoditeria guztiz zaharkitua dago eta ur galerak eta beste hainbat arazo sortu dira, beraz, eraberritze lan hauek erabat beharrezkoak dira. Guztira 1.473 metroko luzerako hoditeria aldatuko da.

Dagoeneko Legarreta (Sacem-go) zubian egin beharreko lanak bukatu dira, zubi horretan egiten ari diren zabaltze lanak baliatuta.

Obra edo lan hauek, saihestezinak izango diren hainbat traba eta arazo sortuko dituzte, izan ere zanja edo lubakiak egin beharko baitira aipatutako hiru auzoetan. Gehienbat errepide alboko espaloietan egingo dira lubakiak eta espaloi hauen zabalera handia dela eta, arazoak ez dira horren larriak izango.

Udala etengabeko harremanetan dago Gipuzkoako Urak-eko arduradunekin eta lan honen gidaritzarekin, beti ere, ahal dugun neurrian herritarrei eragingo dieten traba edo arazoak murrizteko helburuarekin.

Proiektuari buruzko informazio osoa HEMEN: https://www.gipuzkoakour.eus/proveedores_login/Obra_detalle.aspx?Codigo_Obra=%2090129073&proyecto_id=5481&Tipo=0

Kategoria: Nabarmenak

IMG 9900 tokikom 700x700

Santio jaien balorazioa:

Jai giroak eta alaitasunak hartu ditu Villabonako kaleak, parte hartze handia izan duten 2019ko Santio jaietan 

Lehenik eta behin, udalaren izenean eskerrak eman nahi dizkiegu Santio jai hauetan mota guztietako ekintzak antolatzen eta aurrera eramaten lanean aritu diren herritar norbanako eta elkarte guztiei. Jaien aurkezpenean aipatu zen bezala, borondatezko lana egiten duten ehunka herritarren ekarpenik gabe, gaur egun ezagutzen ditugun Santio jaiak ez lirateke posible izango. Zorionez jai hauek, jai herrikoi eta parte hartzaileen eredu ederra izaten jarraitzen dute.

Hainbat arrazoi direla medio, udalak jaien balorazio oso positiboa egiten du.

Aurtengoan ez dugu inolako eraso sexista edo matxistaren berririk izan, ez da salaketarik jarri. Honek ez luke albistea izan behar, baina zoritxarrez berri pozgarria dela aipatu beharrean gaude. Zentzu honetan, herriko mugimendu feministak egindako lana azpimarratu eta txalotu nahi dugu.

Bestalde, ez da garrantzia handiko gertakari tamalgarririk izan. Neurri handi batean saihestezinak diren liskar, lapurreta txiki eta hiri altzarien kontrako eraso gutxi batzuk gertatu dira baina zorionez ez dute ondorio larririk izan.

Egitarauan jasotako ekintza guztiak aurrera atera dira. Eguraldiak hainbat ekintza lekuz aldatzera edo aldaketa batzuk egitera behartu badu ere, aurreikusita eta antolatuta zeuden ekimen guztiak burutu dira. Aipatzekoak dira eguraldi txarrari aurre eginez, besteak beste "Ezkontza" konpartsak eta Santioetan Kantari kantu-jirak izan zuten arrakasta eta parte hartze zabala.

Ezin ditugu aipatu gabe utzi udal langileak; garbiketa lanetan aritu direnak, udaltzainak, kultur teknikariak... lan bikaina egin dute.

Esan bezala, udalak lehen balorazio positiboa egiten du baina ez dagokio udalari Santio jaien balorazioan gehiago sakontzea. Gogorarazi nahi dugu jai hauek Santio Jai Batzordeak antolatzen dituela eta ondorioz, batzorde honi dagokio jaien balorazio zehatzago bat egitea. Garrantzitsua izaten da jai hauetan gertatutakoaren azterketa bat egitea, gehienbat datozen urteetarako irakaspenak ateratzeko eta guztion artean hobetzen joateko. Helburu horrekin, datorren irailean Jai Batzordearen balorazio bilera bat egingo da.

Kategoria: Nabarmenak

67403069 2417688454921072 1952980096881000448 o

Amasa-Villabonako udalak Nerea Agirre eta Jose Carlos Carrasco herritarren heriotza eragin zuen gidariaren aurkako epaiketa ahalik eta azkarren hastea eskatu du

Pasa den uztailaren 29an, Amasa-Villabonako agerraldi publikoa egin zuen, Nerea Agirre eta Jose Carlos Carrasco-ren senideekin, lagunekin eta Oriako txirrindulari taldeko kideekin batera. Hau da Beatriz Unzue alkateak udalaren izenean plazaratu zuen irakurketa:

AMASA-VILLABONAKO UDALAREN OHARRA:

Hilabete honetan jakin dugu, Leongo auzitegi probintzialak Nerea Agirre eta Jose Carlos Carrascoren heriotza, eta Orats semearen zauriak eragin zituen ustezko erantzulearen kartzela aldi prebentiboaren amaiera agindu duela.

Ondorioz pertsona hau askatasun egoeran aurkitzen da gaur egun, honako baldintzekin:

- 3000 euroko fidantza ordaintzea.
- Astelehenero epaitegietan aurkezteko betebeharra.
- Pasaportea eta gidatzeko baimena epaitegian uztea.

2018ko ekainaren 28an gure herria gogor kolpatu zuen gertakari tragiko hura eragin zuen pertsona hasieratik fidantzarik gabe kartzelaratua izan zen.

Gogoratu behar dugu istripua eragin ondoren ihesari eman ziola eta gainera positibo eman zuela ondoren egin zitzaion alkoholemia frogan. Guzti honek samina eta amorrua eragin zituen gure artean eta kasu hau bereziki larria izatea eragin du.

Horregatik Villabonako udaleko bozeramaile batzordeak egindako presazko bilkuran, aho batez erabaki zen auzi honetan udala herri akusazio gisa aurkeztea.

Beraz, badirudi ustezko erantzulea kalean, askatasunean egongo dela epaiketa izan arte. Egoera honek, ezinbestean min gehigarri bat sortu du biktimen familiaren eta oro har herritarren artean, izan ere, legearen arabera behin behineko kartzela aldia bi urtekoa izan daiteke eta kasu honetan urte batekoa izan da.

Amasa-Villabonako udal ordezkariok egoera honekin behin betirako bukatzeko, epaiketa ahalik eta azkarren egitea aldarrikatzen dugu. Ez dauka zentzurik familia eta lagunei samin gehiago eragiteak, nahikoa sufritu dute dagoeneko.

Amaitzeko, Amasa-Villabonako udalaren izenean, auzibide honetan herri-akusazio gisa lan egiten jarraitzeko konpromisoan berresten gara eta Nerea, Jose Carlos eta Orats-en familia eta lagunei gure babes eta elkartasun osoa eskaini nahi diegu une gogor hauetan.

Justizia egin dadila eskatzen dugu, besterik ez.

Amasa-Villabonan, 2019ko uztailaren 29an

Azpikategoria

Zu hemen zaude: Albisteak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.

Buletinera harpidetu