17Urtarrila2021

010.jpg
Zu hemen zaude: Albisteak

Kategoria: Nabarmenak

5530085

Amasa-Villabona eremu gorrian sartu da eta prebentzio neurri bereziak ezarri dira

Momentu honetan Amasa-Villabonan Covid-19ak duen eragin-tasa ehun mila biztanleko 500dik gorakoa denez, aste honetan eremu gorrian sartu da gure udalerria. LABI-k neurri bereziak ezarri ditu egoera honetan dauden udalerrientzat.

Hemen kontsulta daidezke LABI-k ezarri dituen azken neurriak: https://www.irekia.euskadi.eus/eu/news/66088-labi-adapta-las-medidas-preventivas-ante-tendencia-ascendente-pandemia

Ondorioz, laburpen gisa, eremu gorrian jarraitzen dugun bitartean ostalaritza esteblezimenduak itxita egon beharko dute, udalerriaren itxiera perimetrala ezarri da eta taldeko kirolak egitea debekatzen da. Egoera larri eta berezi hau dela eta, Amasa-Villabonako Covid-19aren jarraipen batzordea bildu da ostiralean. Batzorde honetan udalean ordezkaritza duten alderdi politiko guztiek parte hartzen dute, EH Bilduk, EAJ-PNVk eta PSE-EEk. 

Amasa-Villabonako Covid-19aren jarraipen batzordean adostutako neurriak

Honako neurri hauek hartzea adostu da aho batez:

1. Udalerrien arteko koordinazioa: Villabonako Udala, Zizurkil eta Anoetako udalerriekin koordinatu beharko da, batipat mugen kontrolari dagokionez elkarlana bideratzeko. Udal gobernua harreman jarraituan dago bai Zizurkilgo eta baita Anoetako udal ordezkariekin ere.

2. Udaltzaingoari eragiten dioten neurriak: Beste udalerri batzuetarako sarbideetan (Villabona eta Zizurkil arteko zubietan etab...) patruila bereziak egingo dira egun osoan zehar. Zeregin horretan jarraitu beharreko irizpide eta jarraibideak jakinarazi zaizkie udaltzaingoko agenteei. Udaltzaingoaren presentzia indartuko da kalean. Jendea udalerritik irten edo berara sartzera badoa, geldiarazi eta azalpenak eskatuko zaizkie.

3. Seinaleztapena: Udalerriko mugetan kartel edo seinaleak jartzea.

4. Udal-Bando bat argitaratzea:  Ikusi adostutako BANDOA

5. Sare sozial eta komunikabideak: Udal arduradunen aldetik erantzukizunerako eta arauak betetzeko deia luzatuko zaie herritarrei.

6. Kiroldegia: Udala Kiroldegiko arduradunekin harremanetan jarriko da eta Villabonakoak ez diren erabiltzaile eta bazkideei abisu bat zabaltzeko eskatuko zaie (erabiltzaile hauei kiroldegira etortzea debekatua dutela jakinarazteko).

7. Ostalaritza: establezimenduei neurriak betetzearen garrantzia gogoraraziko zaie.

8. Kultura: kultur teknikariekin ere hitz egingo da kultur emanaldiei dagokionez hartu beharreko neurrien inguruan hitz egin eta erabakiak hartzeko. Batez ere Villabonatik kanpoko jendearen presentzia kontrolatu eta ekiditeko.

Kategoria: Nabarmenak

IMG20210105124131

Mendi bizikletan aritzeko Pump Track-a Otsabin

Amasa-Villabonako Otsabi parkean, mendi bizikletarekin ibiltzeko Pump Track izeneko pista berri bat eraiki da eta dagoeneko erabilgarri dago. Zer da Pump Track bat? kirol intalakuntza bat da, finean, mendi bizikletarekin ibiltzeko zirkuito bat. Jolasa eta kirola uztartzen dituen, adin guztetarako balio duen eta mendi bizikletan aritzeko teknika hobetzeko aproposa den instalakuntza publiko bat da.

Elkarlanean eta auzolanaren bidez eraikia

Otsabin eraiki den Pump Track zirkuito berri hau, udalaren eta herriko hainbat mendiko bizikleta zale eta gurasoren arteko elkarlanaren bidez eraiki da. Amasa-Villabonako udalak, Belarmendi Mendiko Nekazaritza SL enpresaren bidez, zirkuitoa eraikitzeko beharrezkoa zen lurra eta makinaria eskuragarri jarri zituen Otsabiko parkean eta herriko hainbat gurasok auzolanean burutu zituzten zirkuitoa sortzeko lanak. Azpimarragarria da herritar hauek erakutsi duten inplikazioa eta lanerako gogoa, modu horretan instalakuntza hau eraikitzeko lanak erraztu eta merketu baitira.

Erabilera arau orokorrak

  • Gune amankomun eta publiko bat izanik, erabiltzaileen arteko jarrera ona eta bizikidetza egokia mantentzea eskatzen da
  • Kaskoaren erabilera derrigorrezkoa da
  • Zirkuitoan erabiltzaile bat baino gehiago dagoenean, denak norabide berean ibili behar dira erabiltzaileen arteko talkak saihesteko.
  • Bizikleten arteko segurtasun tartea mantendu behar da beti
  • Adingabeak beti gutxienez heldu baten gainbegiradapean egon beharko dute
  • Larrialdirik egotekotan 112 zenbakira deitu
  • Lurzorua bustia dagoenean ez erabili zirkuitoa, hondatu egiten baita. 
  • Debekatuta dago motorrarekin sartzea
  • Txakurrak beti lotuta egon beharko dute eremu osoan

Eremua atontzeko lanekin jarraituko da

Pump Track zirkuitoa erabilgarri badago ere, Otsabiko parkearen eremua txukundu eta hobetzeko hainbat lan egin beharko dira datozen asteetan. Zirkuitoaren erabilera arau orokorrak azalduko dituen informazio kartel edo seinale bat ezarriko da eta parkeko eremua txukuntzeko hainbat lan egingo dira: inguruko sasiak kendu, belarra zaindu, zuhaitzak kimatu, parkera iristeko gurutzatu beharreko errepidean zebrabidea margotu, ur iturri bat ezarri etab.

Udala pozik kirol instalakuntza berri honen sorrerarekin

Amasa-Villabonako udal gobernuak bere poza agertu nahi izan du Pump Track instalakuntza berri honen sorrera dela eta. Izan ere, beti da pozgarria herrian kirola praktikatzeko eremu eta aukera berriak izatea. Azpiegitura honekin, medi bizikletan ibiltzeko, kirol osasungarri hau praktikatzeko, jolasteko eta lagun artean ondo pasatzeko beste aukera bat eskaintzea lortu da eta hori oso positiboa da. Ondorioz, udalak Otsabiko parkera gerturatzeko eta Pump Track-a erabiltzeko gonbidapena egiten die mendi bizikletan ibiltzea gustatzen zaien herritar horiei guztiei. 

Amaitzeko, udalak eskerrak eman nahi dizkie proiektu honen bultzatzaileei, Pump Track hau errealitate bat izan dadin musutruk lanean aritu diren herritar guztiei eta Belarmendi-ko langileei.

Kategoria: Nabarmenak

IMG-20201229-WA0012

Aiztondoko udalek euskal presoen urruntzearekin bukatzea eskatzeko manifestazioa deitu dute urtezahar egunean

Aduna, Asteasu, Amasa-Villabona eta Zizurkilgo alkateek agerraldi publikoa egin dute gaur goizean Zizurkilgo udalean (Alkizako alkateak ezin izan du behartaratu). Bertan, bost herri hauetako Udalbatzek gehiengo osoz onartutako Erakunde Adierazpenaren berri eman dute. Aipatzekoa da herri hauetan gehiengo oso handia duten EH Bildu eta EAJ-PNV alderdiek (baita Asteasu Batuz-ek ere) babestu dutela Adierazpena eta PSEk berriz abstentzioa bozkatzea erabaki duela Amasa-Villabona eta Zizurkilgo Udalbatzetan. Larraulgo udal gobernuak ordea, Adierazpena ez onartzea erabaki du aldebakartasunez.

Bestalde, Aiztondoko bost herri hauetako udal ordezkariek, datorren abenduaren 31n, arratsaldeko 18:00etan Villabonako Erreboteko plazatik abiatuko den manifestazioan parte hartzeko deia luzatu diete Aiztondo bailarako herritarrei. Manifestazioa Zizurkilgo Joxe Arregi plazan amaituko da eta "Orain presoak! Euskal Presoak Euskal Herrira" lema izango du. 

Honakoa da Aduna, Alkiza, Asteasu, Amasa-Villabona eta Zizurkilgo udalbatzek onartutako Adierazpena:  

EUSKAL PRESOEN URRUNTZE POLITIKAREKIN AMAITZEAREN ALDEKO ERAKUNDE ADIERAZPENA

Udalbatza honek euskal presoei Espainiako Gobernuak aplikatzen dizkien politikei buruzko azterketa eta balioespena ezagutarazi nahi du.

Udalbatza honek honako lehen eskaera egiten du:

  • Espetxeetako Lege Orokorrak aurreikusten duena bete dadila, askatasunaz gabetzen duten zigorrak bete daitezen norbere ingurunetik deserrotu gabe, birgizarteratzearen printzipioek adierazten duten moduan. Zentzu honetan, 2011 urtean ETAk jarduera armatua utzi zuenean irekitako denboraldi berriaren barruan honako hau adierazten du: beharrezkoa dela beste espetxe politika bat, presoek beren gizarte eta familiako erroak dituzten lekuetatik urrun zigorrak bete beharra ekidingo duena. Politika berri horrek presoak bere familiarekin harremanak izatea erraztuko du eta adin txikiko seme-alaben ongizateari begiratuko dio, gurasoek haiekin egoteko duten eskubidea defendatuz.

Euskal gizarteak bakearen eta bizikidetzaren aldeko apustu garbia egin du. Hainbat modutako eta etengabeko eskaerak egin ditu, iraganeko logiken araberako espetxe politika behin betirako gainditu dadin.

Ondorioz, Udalbatzak honakoa adierazten du:

  1. 2011tik irekita dagoen errealitateari jarraiki, Espainiako Gobernuari eskatzen diogu euskal presoei legedi arrunt soila eta espetxe politika normalizatu bat aplikatzeko beharrezkoak diren urratsak ematea, iraganeko logiken araberako legedian oinarritutako egoera behin betiko gaindituz.
  2. Espetxeetako Lege Orokorrean aurreikusitakoa betetzea eskatzen dugu, askatasunaz gabetzen duten zigorrak betetzean deserrotzerik gerta ez dadin. Askatasunaz gabetzen duten zigorrak familia eta gizarte sustraiak dituzten lekuetatik urrun betetzea ekidingo duen espetxe politika bat ezinbestekoa jotzen dugu.
  3. Premiazkotzat jotzen dugu egungo urruntze politikari amaiera ematea eta Covid-19aren egungo testuinguruan gure sostengua adierazten diegu honako egitasmo hau artikulatzera zuzendutako proposamen guztiei: espetxeratu guztiak orokorrean eta pertsona preso bakoitza, partikularrean, hurbil ditzatela beren familia ingurunetik hurbilen dauden espetxeetara. Euskal Autonomia Erkidegoaren kasuan Martutene, Basauri eta Zaballako espetxeetan birkokatzea dakar neurri horrek.
  4. Helburu hau betetzeak modu erabakigarrian esku hartuko luke euskal gizartean eta politikan iraganarekin lotutako etapa bat ixten lagunduko luke. Gainera, aukera emango luke, biktima guztiak oroituz, bizikidetza demokratikoan ardaztutako orainaldiko eta etorkizuneko denboraldi berri bat eraikitzeko.

Adierazpen hau, honako erakunde eta arduradunei helaraziko zaie:
- Pedro Sánchez, Espainiako presidenteari; Iñigo Urkullu, Lehendakariari; Maria Chivite, Nafarroako Presidenteari; Jean-René Etchegaray, Euskal Hirigune Elkargoko presidenteari.
- Aiztondo bailarako euskal presoak aurkitzen diren Espetxeetako Zuzendaritzei.

Honekin lotuta, udalbatza honek datorren abenduaren 31n "Orain presoak! Euskal Presoak Euskal Herrira" lema izango duen eta Villabona eta Zizurkil arteko ibilbidea gauzatuko duen manifestazio bat antolatzea babesten du, herritarrei parte hartzeko deia luzatzen die eta Amasa-Villabonako udala mobilizazioaren antolatzaile eta deitzaile gisa agertzea onartzen du.

Azpikategoria

Zu hemen zaude: Albisteak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.