22Otsaila2024

007.jpg
Zu hemen zaude: Albiste nabarmenak
20240220 Gaza

Udalak 5.000 euroko laguntza bideratuko du Gazara, Palestinar herriarekin elkartasunez

Gernika-Palestina Deialdi Herritarrak egindako eskaerari erantzunez, Amasa-Villabonako Udalak 5.000 euroko ekarpena egingo dio Palestinan eta zehazki Gazan lan humanitarioa garatzen duen Mundubat Gobernuz Kanpoko Erakundeari. Euskal erakunde honek 1998az geroztik palestinarren eskubideak defendatzeko eta eskualdean bake justua lortzeko lanean dihardu.

Dagoeneko 30.000 pertsona baino gehiago hil dira Palestinan Israelgo okupazioaren bonbardaketak hasi zirenetik. Horietatik gehienak emakumeak eta haurrak dira eta sarraskiak, tamalez, ez du etenik. Egoera lazgarri horren aurrean, Gernika-Palestina Deialdi Herritarra elkarteak Euskal Herritik elkartasun erantzunik bateratuena eman nahi du, eta horretarako, besteak beste, diru-bilketa abiarazi du. Amasa-Villabonako Udalari ere ekarpen ekonomikoa egiteko eskaera egin zion pasa den urtarrilaren 29an.

Bada, gaur eguerdian izandako Ogasun Batzordean ordezkaritza duten alderdi guztiek aho batez adostuta, 5.000 euroko diru ekarpena egingo dio Udalak Mundubat GKEari.

Ekarpen honek bere helburuak bete ditzan, Gernika-Palestina Deialdi Herritarra-k bideratutako diruaren jarraipen zehatza bermatuko du eta urte amaieran Udalari memoria bat aurkeztuko dio, ekarpen honen emaitzak azalduz.

Oharra2

Amasa-Villabonako Udalaren oharra, Tolosan Ertzaintzaren karga batean zauritutako herritarra dela eta

Honakoa da Amasa-Villabonako Udalak sare sozial ezberdinetan dituen kanal ofizialen bidez atzo argitaratutako ohar laburra:

"Atzo goizaldean Tolosan izandako Ertzaintzaren karga baten ondorioz Amasa-Villabonako 16 urteko gazte bat larri zauritua dago begian pilotakada bat jasota. Udalak gertatutakoa argitzea exijitzen du, eta elkartasuna adierazten die zauritutako gazteari eta bere senideei. Azkar senda dadin espero dugu".

Era berean, Beatriz Unzue Esnaola alkateak honakoa adierazi zuen atzo arratsaldean:

"Alkate bezala, harremanetan jarri naiz zaurituaren senideekin, animoak emateko eta Udalaren laguntza eskaintzeko. Alboan izango gaituzte behar dutenerako. Momentu honetan garrantzitsuena tratamendu medikua ondo ateratzea eta gaztea guztiz errekuperatzea da. Horrela izan dadila. Gertatutakoa argitu behar da".

20240130 BerdintasuneanAdos

"Berdintasunean ados!" mahai irekia sortu da, Udalaren berdintasun politikak gidatzeko

Amasa-Villabonako Udalak aurrerantzean garatuko duen Berdintasun Politika modu parte hartzailean erabaki eta martxan jarri nahi du, eta helburu horrekin, "Berdintasunean Ados!" lan-mahai ireki berria aurkeztu du gaur goizean.

Mahai honek Udalean ibilbide bat egin duten beste "Ados!" mahaiek duten izaera publiko, ireki eta parte-hartzailea izango du, eta interesa duen edonor partaide edo partehartzaile izan daiteke.

Mahaia hilero bilduko da, hileko lehen asteazkenetan, 18:30etan, Udaletxeko Batzar Aretoan, eta astebete lehenago Udalak bilera deialdiak eta gai zerrendak argitaratuko ditu www.villabona.eus webgunean eta sare sozialetako kanal ofizialetan.
Udal Gobernuak erabakitze ahalmen osoa aitortzen dio mahai honi. Ondorioz, Udalak garatuko duen Politika Feminista edota LGTBI+ kolektiboaren eskubideen aldekoa, mahai honetan eztabaidatu eta definituko dira, ondoren, Udalak bere baliabideen bitartez aurrera eraman ditzan.

Besteak beste, honako gaiak jorratuko dira mahai honetan: genero berdintasuna, indarkeria matxista, LGTBI fobia, LGTBI+ Komunitatearen bizi baldintzak hobetzeko Udalak garatu zuen plana abiapuntu hartu eta bertako neurriak martxan jartzea, emakumeon ahalduntzea, gizartearen sentsibilizazioa, zaintza sistema komunitario-feminista, hezkidetza feminista eta abar luze bat.

Dagoeneko herriko Mugimendu Feminista antolatuak (Lurgatz eta Akain Talde Feministek), eta Udaleko kale-hezitzaileek konfirmatu dute euren parte-hartzea. Udal gobernuaren aldetik Beatriz Unzue alkateak eta Irune Alfonso zinegotziak parte hartuko dute. Alazne Ayerbe teknikaria izango da mahaiaren dinamizazioa eta gidaritza eramango duena.

Honekin batera helbide elektroniko berri bat sortu da, "Berdintasunean Ados!" mahaiarekin harremanetan jartzeko edo berdintasunari zein aniztasunari lotutako gaien inguruan Udalari kontsulta edota ekarpenak egiteko; E-mail hau spam roboten kontra babestuta dago. JavaScript aktibatuta izatea behar duzu hau ikusteko.

Mahai honek 53.000 €tik gorako aurrekontua izango du bere ibilbidea garatu ahal izateko, eta hainbat partida ekonomiko zuzenean kudeatuko ditu; Politika Feminista, 30.000 €; Genero Indarkeriaren aurkako ekintzak, 5.000 €; eta herriko zaintza sistemaren azterketa, 18.150 €.

Lehenengo bilera: otsailaren 7an, 18:30etan, Udaletxeko Batzar Aretoan

Bukatzeko, parte hartzeko gonbidapena egin nahi diegu berdintasunaren alde ekarpen bat egin nahi luketen herritar guztiei. Ateak zabalik egongo dira denentzat.
Ziur gaude herritarren parte hartzearen bidez, eta denon bultzadarekin, Amasa-Villabona berdinzale, parekide eta feminista eraikiko dugula.

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.