Villabonako Udala

LGTBI+ pertsonen bizitza duinak bermatzeko plana abiatuko du Udalak

Ekainaren 28ko LGTBI+ Harrotasunaren Egunaren harira, Udalean ordezkaritza duten alderdi politiko guztiek kolektibo honen eskubideak aldarrikatu zituzten Osoko Bilkuran. Horrekin batera, LGTBI+ komunitatea osatzen duten pertsonek Amasa-Villabonan bizi duten egoera ezagutzeko diagnostiko bat egin, eta ondoren ekintza plan bat abiatzeko konpromisoa hartu zuten.

Bada, diagnostiko hori egiteko Eihera Kooperatibak aurkeztutako proiektua onartzea erabaki da, kooperatiba honek esperientzia nabarmena baitu horrelako egitasmoak garatzeari dagokionean.

Udal honek Amasa-Villabonako herritar guztien askatasuna eta eskubide berdintasuna bermatu nahi du, eta horretarako inolako diskriminazio edo zapalketarik gabeko jendartea eraikitzeko lan egiten jarraitu behar du. Zentzu horretan, funtsezkoa da sexu-orientazio edota genero-identitateari buruzko aurreiritziak eta estereotipoak zokoratu eta ezabatzea, egiazko berdintasuna lortzeko urrats sendoak emanez.
Eihera Kooperatibako ordezkaria den Iñigo Etxezarretak nabarmendu duen moduan “Azken urteetako LGTBI+ mugimenduaren gorakada, eta mugimendu feministaren lanari esker, kolektibo ezberdinen behar eta aldarrikapenak plaza publikora eta agenda politikoaren erdigunera ekartzea lortu da, eta hori ezinbestekoa den arren, instituzio gehienek ez dute arreta gehiegi jarri LGTBI+ pertsonen errealitatean”. Horrela, Villabonako udalak eta Eihera Kooperatibak elkarlanean, herriko LGTBI+ pertsonen bizi baldintzak hobetzeko neurri eta politika publikoen diseinuari ekingo diote. LGTBI+ pertsonen bizitzak hobetzeko neurri, esku-hartze eta ideia ezberdinen bateria sortzea izango da Eihera Kooperatibaren zeregin nagusia, jarraian, ondorio horiek modu autonomo eta ordenatuan aplikatzeko.
Ibilbideak fase ezberdinak izango ditu: Hasteko, herriko LGTBI+ pertsona, eragile feminista, elkarte eta norbanako ezberdinekin bilduko dira Eiherako teknikariak, kolektiboaren behar, aldarrikapen eta ikuspegi ezberdinei arreta berezia jartzeko. Ondoren, udaleko sail ezberdinekin lan-saio ezberdinak ere burutuko dira, administrazioaren barruan dauden muga, zailtasun eta aukerak arakatzeko. Azkenik, egindako ibilbidearen berri eman, eta sortutako neurri eta politiken aurkezpena egingo da.

Egitasmo hau behar bezala garatu dadin, ezinbestekoa izango da LGTBI+ kolektiboa osatzen duten herritarren bizipenak, iritziak eta errealitateak jasotzea. Beraz, prozesu honetan beren ekarpena egitera animatu nahi ditu Udalak. Horretarako, nahikoa izango da E-mail hau spam roboten kontra babestuta dago. JavaScript aktibatuta izatea behar duzu hau ikusteko. e-mail helbidera mezu bat idaztea, edo 623 30 71 59 telefono zenbakira deitzea. Ekarpenak guztiz anonimoak izango dira.

Konbentzituta gaude elkarrekin LGTBI+ fobiarik gabeko Amasa-Villabona eraikiko dugula; askatasunean eta zapalkuntzarik gabe biziko den herria, aniztasuna errespetatzen duena, eta guztien eskubideak aitortzen dituena.

Bolatokia estali eta padel pistak eraikitzeko proiektua atzeratzen ari da araudi urbanistikoagatik

Amasa-Villabonako udalak herritarrei zuzendutako azalpenak eman nahi izan ditu, bolatokia estali eta padel pistak eraikitzeko proiektuaren egoera zein den azaltzeko. Horretarako ohar hau kaleratu du udal gobernu taldeak:

2021eko azaroan garatutako herri galdeketan babesik handiena lortu zuen proiektu honek eta lehen unetik proiektua gauzatzeko konpromisoa hartu zuen udalak.
Hau horrela izanik ere, proiektua definitu, onartu eta eraikitze lanak abiatu ahal izateko prozesuan, espero gabeko zailtasun bat aurkitu du udalak.

Zehazki araudi urbanistikoarekin lotutako arazo bat da; Amasa-Villabonako Hirigintza Antolamenduaren Plan Orokorrak (HAPOak) espazio libre gisa kalifikatzen du Olaederra kiroldegi ondoan 3.523 m2-ko azalera duen eremua. Espazio libreak aisialdi publikorako eraikuntzarik gabeko lursailak dira eta ondorioz, eremu horretan apaindura-eraikinak, behin-behineko eraikuntzak eta zorupeko azpiegiturak baino ez dira baimentzen.

Egoera honetan, bolatokia estali eta padel pistak eraiki ahal izateko ezinbestekoa da Hirigintza Antolamendua aldatzea eta udalak horretarako prozedura abiatu behar izan du. Zoritxarrez prozedura hori oso luzea izaten da eta oraindik tramitazio fasean dago.

Horregatik proiektu hau uste baino askoz gehiago atzeratzen ari da eta udalaren aurreikuspenak ez dira beteko.

Udalak bere atsekabea adierazi nahi du, herritarren babesik handiena izan zuen egitasmo hau nahi bezala martxan jartzeko izaten ari den zailtasunengatik. Era berean, udalak publikoki barkamena eskatu nahi die Amasa-Villabonako herritarrei, atzerapen handiegi honegatik. Ez dago aitzakiarik, udalaren aurreikuspen akats bat izan da eta udalari dagokio onartzea eta herritarrei gardentasun osoz azaltzea.

Tona batetik gora hondakin bildu ditu Udalak, herriko ibai eta naturguneetan

Udalak, Urzain taldearekin duen kontratuaren baitan, herriko ibaiak, errekak eta naturguneak garbitzen jarraitzen du hilabetero aste betez. Horrela, azken hiru hilabeteotan, guztira 1.093 kg hondakin erretiratu ditu Amasa-Villabonako hainbat bazterretatik; uztailean 375 kg, abuztuan 292 kg, eta irailean 426 kg, hain zuzen ere.

Batez ere, Oria ibaiaren ertzak garbitu dira udako hilabete hauetan: Azketa errekatik Ubillots errekaraino, Irurako mugatik Agaraitz industrialderaino, eta Antzibarko presa inguruak. Horietaz gain, Komizar eta Lasturgo naturguneetan, Aranerrekan, eta Ubegungo zonaldean topatutako hondakinak ere jaso dira.

Jorratutako eremu hauetan mota guztietako hondakinak topatu dira: latak, musukoak, eraikuntza hondakinak, gurpilak… deigarria da ia 400 lata eta 4.000 toallita baino gehiago jaso izana.

Uztailean gaika jasotako hondakinen kopurua
Abuztuan gaika jasotako hondakinen kopurua
Irailean gaika jasotako hondakinen kopurua

Hilabetero egiten den bezala, Tolosaldeko Mankomunitateak dituen bi garbiguneetan utzi aurretik, jasotako material guztia zegokion edukinontzietan sailkatu eta behar bezala kudeatu da.

Garbitutako eremuen hilabeteroko zaintza eta kontrola egiten bada ere, Udalak gizalegez jokatzeko eta sortzen diren hondakinak dagokion bezala sailkatu eta kudeatzeko deia luzatu nahi die herritarrei. Guztion ardura da gure herria, eremu naturalak, ibaiak eta oro har ingurumena zaintzea.