18Apirila2024

002.jpg
Zu hemen zaude: Albiste nabarmenak
20230303LaSalvadoa

Herriko industrian jardun duten emakume langileak omenduko ditu Udalak martxoaren 8an

Emakumeen Nazioarteko Eguna da martxoaren 8a, emakumeen eskubideen aldeko aldarrikapena egiteko eguna.

Historian zehar emakumea rol tradizionalarekin lotu izan da beti: etxean, etxeko lanetan, sukaldean, garbiketan, josten, haurren zaintzan … Baina, emakumeek, funtsezko ekarpena egin dute ekonomiaren garapenean. Horregatik, aurtengo martxoaren 8an, herriko industrian lan egin duten emakume langileak ikusarazi, goraipatu eta Amasa-Villabonari egindako ekarpena aitortu nahi die Udalak, ekitaldi xume baten bidez.

Aitortza ekitaldia asteazkenean, martxoaren 8an bertan, izango da, La Salvadora jubilatu etxearen parean, eguerdiko 12:30ean, eta Villabonako La Salvadora papergintza enpresako emakume langileen argazki-mural bat jarriko da eraikinaren fatxadan. Emakume langile horiengatik izan ez balitz, Amasa-Villabona ez litzateke gaur egungoa izango.

Zine emanaldia, martxoaren 7an
Emakumeen Nazioarteko Egunaren baitan, Amasa-Villabonako Udaleko Berdintasun sailak doako zine emanaldia antolatu du martxoaren 7rako. Simone, la mujer del siglo filma ikusteko aukera egongo da Gurea antzokian, arratsaldeko 19:00etan. Sarrera doan da.

Aiztondoko Mugimendu Feministaren aldarriarekin bat
Udalak bat egiten du Aiztondoko Mugimendu Feministaren aldarriarekin, eta martxoaren 8rako deitu duen manifestazioan parte hartzera animatu nahi ditu herritarrak. Mobilizazio Villabonako Erreboteko plazatik abiatuko da 19:00etan, eta Zizurkilgo Joxe Arregi plazan bukatuko da.

Deskargatu kartela

20230223 ItzuliaAurkezpena

Itzulia Basque Country lasterketako 3. etaparen ibilbidea aurkeztu dute gaur eguerdian

Gaur eguerdian, Amasa-Villabonako Udaletxeko Batzar Areto Nagusian, Itzulia Basque Country txirrindulari lasterketako 3. etaparen aurkezpena egin dute Beatriz Unzue alkateak, Gorka Kamio Kiroletako zinegotziak, Xabat Laborde alkateordeak, eta Itzulia Basque Country antolakuntza taldeko ordezkaria den Julian Erasok.

Honakoa da gaur udalak argitaratu duen oharra:

Itzulia Basque Country lasterketako 3. etaparen ibilbidearen aurkezpena

Amasa-Villabonako udalak eliteko txirrindularitza profesionala herrira ekartzeko apustua egin du aurten eta Itzulia Basque Country lasterketaren antolatzaileekin sinatutako kontratuaren bidez, aurtengo edizioko 3. etaparen amaiera izatea lortu du.

Jakina denez, Euskal Herri osoan bezalaxe, txirrindularitzak jarraitzaile asko ditu gure herrian. Gainera Amasa-Villabonak eta Aiztondo bailarak txirrindulari harrobi garrantzitsu eta emankorra izan dute historikoki. Zentzu horretan, Villabonako Irrintzi elkarteak urte luzez txirrindularitza harrobia lantzeko egindako lan handia azpimarratu nahi dugu, belaunaldi askori txirrindularitzaz gozatzeko aukera eskaini izan baitie. Azken urteetan Danena txirrindularitza taldeak hartu du gure herrian txirrindulari gazteekin lan egiteko lekukoa eta egiten ari diren lana txalotu nahi dugu.

Dagoeneko 21 urte igaro dira maila goreneko txirrindularitza profesionalak gure herrian helmuga bat izan zuenetik, eta uste dugu honakoa momentu egokia dela berriro ere munduko txirrindulari onenek osatutako tropela Amasa-Villabonara ekartzeko.

Udalak guztira 50.000 euroko (+BEZ) inbertsioa egingo du etapa amaiera izateko, baina azken asteetan kopuru hori murrizteko ahalegina egiten ari da, publizitate euskarri ezberdinen bidez inguruko enpresen babesletzak lortuz. Beraz, momentu honetan ezin dugu zehazki adierazi udalak zenbateko diru ekarpena egin beharko duen azkenean.

Apirilaren 5eko Itzulia Basque Country-ko 3. etaparen ezaugarri nagusiak:

Lehenik eta behin, aipatu behar dugu hasieratik udalak, Itzuliako antolatzaileekin adostasunez eta elkarlanean, batez ere azken kilometroetan ibilbide gorabeheratsua, teknikoa, gogorra eta ondorioz ikusgarria osatzeko apustua egin duela. Itzuliako etapek normalean izaten duten intentsitatea, tentsioa eta kalitatea geurera ekartzea izan da helburua, eta uste dugu lortuko dugula.

Datu nagusiak: Guztira 153,9 kilometroko ibilbidea izango du etapak, guztiak Gipuzkoako lurraldean, 3. mailako bost mendate puntuagarri eta bi esprint puntuagarrirekin.

Etapa Errenteriatik abiatuko da lehen 65 kilometroak Gipuzkoako kostaldean zehar izango dira, besteak beste, Donostia, Orio, Zumaia eta Zarautzetik igaroz. Kilometro hauetan ez da mendate aipagarririk izango baina jakina denez ibilbide bihurria izango da, lautada gutxi eta igoera eta jaitsiera txiki askorekin.

Lehen mendate puntuagarria Meagas izango da, 3. mailakoa, eta ondoren etaparen 80. kilometro inguruan Andazarrate, 3. mailako mendate luze eta etzana igoko dute txirrindulariek. Zaila izango da mendate hauek tropela apurtzea, baina ihesaldiak antolatzeko ibilbide egokia izan daiteke.

Ondoren, Asteasu atzean utzi eta lehen aldiz txirrindulariak Villabonatik pasako dira, bertan lehen esprint puntuagarria izango delarik. Zehazki Kale Berrian, Malkar plaza parean ezarriko da esprinteko marra, etaparen 92. kilometroan.

Jarraian, Villabonatik Anoeta aldera hartuko dute Sacem ondoko bidetik. Momentu horretan, helmugara 60 kilometroren faltan, etapako benetako lehen interes gunea helduko da, izan ere, errepidea asko estutuko da eta Villabona atzean utzi eta berehala, trenbidearen gaineko zubi estu bat igarota, txirrindulariek lehenengo malda gogorrei aurre egin beharko diete. Errepide estua eta hormigoizko zorua izango dute ia 2 kilometroko tarte batean, eta horri tarte batzuetan %15 inguruko malda gehitu behar zaio. Etapako tarte berezi hau Ateaga baserriko gaintxoan amaituko da eta hortik Anoetara jaitsiko dira, jaitsiera estu eta arriskutsuan. Ez da mendate puntuagarria izango, baina ziur gaude tarte honek zer esana emango duela.

Anoeta eta Tolosa igaro ondoren, Tolosaldeko hainbat herritatik pasatuko da tropela; Altzora igoera (3. mailako mendate puntuagarria), Alegia, Amezketa, Abaltzisketa, Orendaingo igoera (3. mailakoa hau ere) eta bigarren aldiz Altzora igoko dira. Hortik berriro ere Villabonarako norabidea hartuko dute, Tolosatik Anoetara joz.

Momentu horretan, helmugara iristeko 15 kilometro inguru faltako direnean, hasiko da etaparen azken tartea, tarte erabakiorra eta zalantzarik gabe ikusgarriena. Lehenik, Anoetatik Sarasola sagardotegira igotzeko aldapa motz baina oso pikoa igo beharko dute, berriro ere %15etik gorako malda tarteekin. Hortik, Asteasu eta Zizurkil tarteko industria poligonora jaitsiko dira eta helmugatik 10 kilometro ingurura Zizurkilgo hilerrira igoko dira, Azken portu auzotik gora igotzen den errepide estutik. Igoera motz horretan ere, txirrindulariek %10etik gorako maldei aurre egin beharko diete. Zizurkil goiko plazatik igaro ondoren, Aduna aldera zuzenduko dira, Adunara igotzeko aldapari aurre eginez. Adunako herrian ezarriko da etapako bigarren esprinta, helmugatik soilik 4 kilometrora. Adunatik Andoain aldera jaitsi eta Villabonarako norabidea hartuko dute protagonistek.

Villabonara Agaraitz aldetik sartuko dira txirrindulariak eta kale Berria osorik igaroko dute Villabonako eliza ondoko bidegurutzera arte. Hortik Otsabi auzora joko dute eta bertan, helmugara iristeko kilometro bakarra faltako denean, hasiko da etapa erabakiko duen azken aldapa: Hika txakolindegian amaitzen den aldapa beldurgarria. Batzuek Hikako "pareta" gisa izendatu dute dagoeneko. Azken kilometro horrek bi zati ezberdin izango ditu, lehen 500 metrotan malda ez da horren gogorra, baina Arratzaingo futbol zelai ondoko aparkalekua igaro ondoren, 300 metro inguruko aldapatzarrari aurre egin beharko diote. Aldapa hori mahastien artetik igarotzen da eta %26ko maldak ditu tarte batzuetan. Zalantzarik gabe azken metro hauetan txirrindulariek egin beharko duten esfortzuak irudi ikusgarri eta epikoak utziko dizkigute, zaleen gozamenerako.

Hauxe izan da ibilbidearen laburpena, datozen asteetan informazio zehatzagoa eskainiko dugu, ordutegiak, hartu beharko diren trafiko neurriak etab.

Bukatzeko, datorren apirilaren 5ean Amasa-Villabonara etortzeko gonbidapena egin nahi diegu kirolzale eta txirrindularitza zale guztiei, ikuskizuna bermatuta dago eta zale guztiak beso zabalik hartuko ditugu. Animatu, eta zatozte goi mailako txirrindularitza bertatik bertara ikustera.

Ikusi 3. etaparen ibilbidea

20230222UdalLiburutegia

Udal liburutegia handitu eta eraberritzeko aurreproiektua onartu du Hirigintza batzordeak

Atzo izandako Udaleko Hirigintza Batzordean alderdi politiko guztietako ordezkariek aho batez onartu zuten Sebastian Insausti udal liburutegia eraberritzeko lanen aurreproiektua.

Gehiago irakurri...

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.