18Apirila2024

002.jpg
Zu hemen zaude: Albiste nabarmenak
20230208Edukiontziak

Hondakinen gaikako bilketa %72,5ekoa izan da Amasa-Villabonan

Tolosaldeko Mankomunitateak 2022 urtean etxeko hondakinen sorrera eta bilketa datuak argitaratu ditu. Amasa-Villabonaren kasuan, guztira, ia 1700 tona hondakin sortu ziren aurreko urtean, eta horietatik %72,54 gaika bildu zen. 2021 urteko datuekin alderatuta, apenas egon da aldaketarik.

Aipagarria da, amasa-billabonatar bakoitzak, bataz beste, ia 300 kg hondakin sortu zituela 2022an.

Jasotako datuak hilabeteka aztertuz gero, uztailean izan zen hondakin gehien sortu zen hilabetea, 152.000 kg, hain zuzen ere. Aldiz, otsaila izan zen hondakin kopuru txikiena sortutako hilabetea; 124.000 kg-rekin. Gaikako bilketari dagokionez, urtarrilean lortu zen urteko portzentajerik altuena %75a gaindituz. eta gaika gutxien jaso zen hilabetea abuztua izan zen %70etik beherako portzentajearekin. 

Tolosaldeko Mankomunitateak argitaratu berri dituen datuen balorazio gazi-gozoa egin du Amasa-Villabonako Udalak. Hondakinen bilketari dagokionean, gaika bildutakoaren portzentajea beti %70etik gorakoa izateko konpromisoa hartu zuen udalak 2016an. 2022an %70eko langa hori gainditu bada ere, oraindik ere badago non hobetua. Beraz, Udalak zentzuz eta arduraz jokatzeko deia egin nahi du, eta sortzen diren hondakinak behar bezala sailkatu eta bakoitza dagokion edukiontzi barrura botatzea eskatzen die herritarrei.

Amasa-Villabona: etxeko hondakinen sorrera

Render 3 Nuevo Sin fondo

Urtarrilaren 9an hasiko dira Olaederra kiroldegiko teilatua eraberritzeko lanak

Udaleko Hirigintza sailak jakinarazi duenez, datorren urtarrilaren 9an hasiko dira Olaederra Kiroldegiko kantxa gaineko teilatua guztiz eraberritzeko lanak. Proiektu honen bidez, gaur egungo teilatuak dituen arazo larriekin amaituko da eta estalki berria ezarriko da. 

Obra honi buruzko informazio osoagoa kontsulta daiteke hemen: https://villabona.eus/eu/albiste-nabarmenak/3605-udalak-kiroldegiko-teilatua-eraberrituko-du.html

Horrela, obra zein eraikuntza enpresak egingo duen erabakitzeko esleipen publikoaren prozedura amaituta, Cubiertas y Pinturas HERGAR SL enpresak lortu du udalaren kontratazioa. Azkenik aurrekontua guztira 344.749,32 eurokoa izango da eta gehienez 3 hilabeteko luzapena izango du obra osoak. Udalak Gipuzkoako Foru Aldundiak kirol instalakuntzak eraberritzeko duen dirulaguntza lerrora aurkeztuko du proiektua eta dirulaguntza garrantzitsu bat eskuratzea aurreikusten du. 

Beraz, obra honen ondorioz, Olaederra Kiroldegiko kirol-kantxa nagusia itxita egon beharko da ia 3 hilabetez. Barkatu eragozpenak.

 

20221222Manifestazioa

Euskal presoen eskubideen aldeko manifestazio ixila antolatu dute Aiztondoko udalek

Amasa-Villabona, Zizurkil, Asteasu, Aduna eta Alkizako udal ordezkariek (tartean herri hauetako alkate guztiak) agerraldi publikoa egin dute gaur eguerdian Villabonan, eta datorren abenduaren 31n, arratsaldeko 18:30ean egingo den euskal presoen aldeko manifestazio ixila aurkeztu dute.

Manifestazioarekin eta aurkeztutako mezuarekin bat egiteko aukera mahai gainean jarri zaien arren, Larraulgo udal gobernuak eta Amasa-Villabonako EAJ-PNV eta PSE alderdiek ez dute deialdiarekin bat egin.

Hau da gaurko agerraldian Aiztondoko udal ordezkariek kaleratu duten oharra:

EUSKAL PRESOEN ESKUBIDEEN ALDE MANIFESTAZIO ISILA

2022. urtearen amaierara heldu gara eta beste urte batez hemen gaude, euskal presoen eskubideak errespeta daitezela aldarrikatzeko mobilizazioa antolatu dugula iragartzeko. Aiztondoko udal ordezkariok gure konpromisoa berresten dugu euskal presoen eskubideen defentsan.

Zorionez, euskal alderdi politiko, sindikatu eta erakunde sozialen ahaleginari esker, baina, batez ere, gizarte zibilaren bultzada irmoari esker, presoen urruntze-politika desagertzea lortzen ari gara.

Gaur da eguna, Aiztondoko preso guztiak Euskal Herriko espetxeetan daudena. Bada zerbait.

Horregatik une egokia da, dispertsio eta urrunketa politikak eragindako sufrimendua gogora ekartzeko. Presoen senide eta lagunak zigortzeko helburuarekin martxan jarritako politika anker horien ondorioz, urte luzez Aiztondoko senide eta lagunek milioika kilometro egin behar izan dituzte errepideetan, horrek zekarren arriskuarekin. Astebururo ordu mordoa bidaiatzen pasa behar izan dituzte, senide edo lagun presoarekin 40 minutuko bisita bat edukitzeko. Aiztondoko ehunka herritarrek derrigorrez ezagutu behar izan dituzte Huelva, Curtis, Puerto de Santa Maria, Granada, Algeciras, Fleury edo Fresnes bezalako espainiar eta frantziar hirien zerrenda luze bat.

Zorionez, dispertsioa eta urrunketa, milaka euskal herritarren eskubideak urratu dituen politika zentzugabea, gure herriaren historiako pasarte ilun bat izatera pasako da laster. Hori bai, errepideetan hildako 16 pertsona eta ehunka zauritu atzean utziz.
Hala ere, tamalez, euskal presoek pairatzen dituzten eskubide urraketak oraindik ez dira amaitu.

Alde batetik, espetxeetako bizi baldintzek asko dute hobetzeko, bis familiarrak hilero egiteko eskubidea ez da errespetatzen, ez da mediku asistentzia egokia bermatzen eta birgizarteratzeko baliabide gehiago behar dira.

Bestalde, arlo politiko eta batez ere judizialean, espainiar estatuko sektore kontserbadore eta ultrak atzera egin nahian dabiltza. Teknikoak izan behar luketen erabaki judizialak eskuin-mutur politikoaren postulatu eta ideologiaz zipriztintzen ari dira, berriro ere euskal presoen eskubideak urratuz. Estatuko fiskaltza eta Auzitegi Nazionala erabiltzen ari dira errepresio tresna bezala.

Espetxean bi hamarkada, edo hiru ere, bete dituzten presoek hirugarren gradua eta erdi-askatasuna lortu ondoren, behin eta berriro ikusten ari gara berriro espetxeratu egiten dituztela, bigarren gradura bueltaraziz. Hori ez da justizia. Hori mendekua da.

Eusko Jaurlaritzak hirugarren gradura eta erdi-askatasunera igarotzea onartu dien 33 presoetatik 23 errekurritu ditu fiskaltzak; horietatik 6 espetxera itzuli dira eta 13 Espetxe Zaintzako Epaitegiaren erabakiaren zain daude. Horrela, Auzitegi Nazionalak boikota egiten die espetxeetako profesionalen erabakiei, haiek baitira presoen bilakaera ezagutzen dutenak.

Aiztondoko udal ordezkariok tinko salatzen ditugu euskal presoen etxeratzea oztopatzeko aplikatzen ari diren gradu erregresio horiek guztiak.

Espainiar eskuin muturrak sustatutako atzeraldi honen aurrean, Euskal Herrian berriro ere, bakea, bizikidetza eta konponbidea aldarrikatzea dagokigu. Giza eskubideak defendatzen ari gara eta horretan ez dugu inoiz atzera egingo.

Amaitzeko, ahalik eta azkarren euskal presorik gabeko eszenatoki bat lortzeko itxaropena plazaratu nahi dugu, hori izango baita herri honetan bakean eta elkarbizitzan aurrera egin dugunaren adierazlerik garbiena.

Guzti honegatik, Aiztondo bailarako Aduna, Alkiza, Amasa-Villabona, Asteasu eta Zizurkilgo udalek MANIFESTAZIO ISILA antolatu dugu ABENDUAREN 31n 18:30etan Villabonako Erreboteko plazatik hasita, Zizurkilgo Joxe Arregi plazaraino.

Aiztondo bailaran, 2022ko abenduan.

MANIFESTAZIOAREN KARTELA

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.