18Apirila2021

005.jpg
Zu hemen zaude: Albiste nabarmenak
IMG 4416

2021rako Ordenantza Fiskalak onartu ditu udalbatzak

Astearte arratsaldean izandako udalbatzaren osoko bilkuran, udal gobernuak aurkeztu eta udal gobernuak proposatutako 2021rako Ordenantza Fiskalak onartu ziren aldeko 7 bozkarekin (EH Bildu) eta 5 abstentziorekin (EAJ-PNV eta PSE).

Zerga eta tasa guztiak izoztuta (igoerarik gabe), hondakinen bilketaren tasa izan ezik

Udalak tasa, zerga eta udal zerbitzuengatik ordaindu beharreko kuota ia guztiak bere horretan igoerarik gabe mantenduko ditu, igoera izango duen tasa bakarra hondakinen bilketa eta tratamenduarengatik ordaintzen dena izango da. Tasa hau %5ean igoko da.

Udal gobernuak igoera hau justifikatuta dagoela baloratu du; hondakinak bildu eta kudeatzen dituen Tolosaldeko Mankomunitateari udalak ordaindu beharrekoa asko handitu delako (aurreikusitakoa baino gutxienez 50.000 euro gehiago ordaindu beharko ditu udalak 2020an), gaikako bilketaren portzentaiak jaitsi izanagatik (urtarriletik uztailera %6ko jeitsiera izan du) udalak hondakinen kudeaketarako diru gehiago ordaindu behar izan duelako, urte luzez izoztuta egon den tasa bat delako eta alboko udalerrietan hondakinen bilketagatik herritarrek ordaintzen dutenarekin konparatuz, Amasa-Villabonan ordaintzen dena oso kopuru baxua delako. Adibidez, Amasa-Villabonako herritarrek tasa honi dagokionez urtean 89,36 euro ordaintzen dituzten bitartean, Tolosan 129,80 euro, Asteasun 132,96 euro, Ibarran 137,36 euro edota Zizurkilen 145,40 euro ordaintzen dira.

%5eko igoera honek, herritarrek tasa honegatik ordaindu beharreko kopurua 1,12 eurotan igoko du hiruhileko (22,34tik 23,46ra) eta beraz, 2021. urtean herritarrek 2020an baino 4,48 euro gehiago ordaindu beharko dute (89,36tik, 93,84ra)

Udal gobernuak aitortu du neurri hau momentu honetan hartzea ez dela erraza eta popularra, baina gobernuak udaleko kontuen orekarekin beti arduraz jokatu behar dela argudiatu du eta hondakinen bilketarekin diru-sarreren eta ordaindu beharrekoaren arteko desoreka handiegia bilakatzen ari zela azaldu du. Era berean, gobernu taldeak zerbitzu honek defizitarioa izan behar duela aitortuta ere, udaleko ekonomian eta aurrekontuetan pisu handiegia hartzen ari zela baloratu du "jendearentzat esfortzu txiki bat izango da eta udal ekonomiarentzat oxigenoa ekarriko du, udalak bere zerbitzu guztiak ematen jarraitu ahal izan dezan".  

EAJ-PNV eta PSE alderdietako ordezkariek Ordenantza Fiskal hauek ez babestea eta abstentziora jotzea erabaki zuten, hondakinen bilketako tasa igotzea ez dela egokia argudiatuta.

Hobari guztiak mantendu dira

2020an udal gobernuak martxan jarritako eta aurretik jasota zeuden hobari guztiak mantendu dira eta dokumentu honetan kontsultatu daitezke: ZERGA ETA TASEN HOBARIEN ZERRENDA

Gislan prentsaurrekoa

Udalak etxebizitza politika berria garatuko du 2021etik aurrera

Julen Landa, Gislan Kooperatibako ordezkariak, gaur eguerdian prentsaurrean aurkeztu du Amasa-Villabonako metabolismo demografikoa eta etxebizitza beharren azterketa. Kooperatiba honek garatutako txostenari esker etxebizitza politika desberdinak diseinatzeko informazio baliagarria eskaini dio Amasa-Villabonako udalari.

Etxebizitza politika eraginkor bat diseinatu eta martxan jartzeko aukera

Gislan Kooperatibak garatutako lanari esker, Amasa-Villabonako udalak adierazle sozio-demografikoen eta etxebizitza parkearen datu base zabal bat du esku artean. Txosten horrek, gainera, etorkizunera begira proiekzio edo aurreikuspenak ere jaso ditu, adibidez, etorkizunean gure udalerrian zein etxebizitza behar egongo den. Ondorioz, udalak oinarri gisa erabiliko duen ezinbesteko tresna izango den egoeraren analisi eta diagnostiko zehatz bat du orain.
Azterlan honekin urrats garrantzitsu bat eman du Amasa-Villabonako udalak, horrela, etxebizitzaren problematikari heldu, eta etxebizitza politika eraginkor bat diseinatu eta martxan jarriko baitu.

Hainbat erronka identifikatu dira

• Gazteak Amasa-Villabonan errotzea. Bizi dugun biztanleriaren zahartze prozesuak, gazteak herrian mantentzearen eta beren emantzipazioa herrian bertan egitearen garrantzia biderkatu du. Bizi dugun egoeran, ezin dugu onartu herriko gazteak beste herri batera joatea, gurean etxebizitza lortzeko dituzten zailtasunengatik.

• Alokairuaren eskaintza zabaltzea, zentzuzko prezioetan. Alokairuen eskaintza apala eta ordaindu beharreko prezio altuegia arazo orokorra da Euskal Herri osoan, baina beste erakunde edo administrazio publikoek ez badute arautzen, udaletik egin beharko dugu ahalegina. Alokairu gehiago eta merkeagoak izatea ezinbestekoa da.

• Etxebizitza hutsen merkaturatzea. Amasa-Villabonako etxebizitzen %10a hutsik dago eta udaletik etxebizitza horiek erabilgarri egon daitezen eta jendez bete daitezen eragin behar da. Orain arte hartutako neurriek etxebizitza hutsei zerga errekargua ezartzearena kasu, ez dute Udalak nahi lituzkeen emaitzak eman.

• Bizikidetza unitateen gehikuntzari erantzutea. Amasa-Villabonako bizikidetza unitateen kopuruak gora egingo du datozen urteetan eta bizikidetza unitate horiek gero eta txikiagoak edo pertsona gutxiagok osatutakoak izango dira. Egoera horri erantzuteko, neurri batean etxebizitza eskaintza zabaldu edota moldatu beharko da.

Udalak etxebizitza politika aktibo bat garatzeko konpromisoa

Erronka hauei erantzuteko Amasa-Villabonako udalak 2021. urtean etxebizitza politika aktibo bat garatzen hasteko konpromisoa hartzen du. Helburu eta neurri zehatzak jasoko dituen plangintza bat osatuko du, kronograma eta ekintza plan batekin.

Udal gobernu honentzat etxebizitzaren gaian dituen erronkei heltzea oso garrantzitsua da eta lan-ildo estrategiko gisa definitzen du. Etxebizitza politika aurrerakoi, eraldatzaile eta eraginkorra osatu eta garatu nahi du, gauzak aldatu daitezen eta etxebizitza duina izatea benetako eskubidea izan dadin.

Gislan Kooperatibari Udalaren esker ona

Amasa-Villabonako udalak eskerrak eman nahi dizkio Gislan Kooperatibari, azken hilabeteetan egindako lan guztiagatik eta eskainitako informazio baliagarri guztiagatik.

 

Amasa-Villabonako metabolismo demografikoaren eta etxebizitza parkearen azterketa

alkateak-mugimendua

Eskualdeko osasun mahaia osatzeko deia egin dute Tolosaldeko 25 alkatek

Zain egon gabe, proposamen zehatzak egiteko eta erabakiak hartzeko garaia dela aldarrikatu dute

Gaur goizean Beatriz Unzue, Igor Zapirain eta Arantxa Irazusta, Amasa-Villabona, Ibarra eta Alegiako alkateek prentsaurrekoa eskaini dute Ibarrako udaletxean eskualdean osasun publikoaren inguruan dagoen gatazkaren inguruan. Eskualdeko alkateek osatu duten mugimenduaz, alkate hauek osatutako proposamenen berri eta eskualdeko mahaia osatzeko deialdiaz aritu dira.

Honakoa da hiru alkate hauek, Tolosaldeko 25 alkateren izenean plazaratu duten oharra:

2020ko otsailaren 17an Tolosaldeko osasun publikoaren egoerak kezkatuta 25 alkatek akordio bat sinatu genuen. Bertan, parte-hartze prozesu bat martxan jartzeko eskatu genion Jaurlaritzari eta honen harira, eragile, udal eta Jaurlaritza parte izango ziren mahai bat osatzeko.

Zortzi hilabete pasa dira jada ordutik, COVIDak markatutako zortzi hilabete zail. Argi ikusi dugu COVID-aren krisiak aurretik genuen osasun egoera larritu eta azaleratu besterik ez duela egin. Larunbateko manifestazioan garbi gelditu zen Tolosaldeko herritarrek aspalditik eskatzen dutena, eskualdean dagoen haserre eta ezin egona agerian utziz.

Mugimendu hauen bueltan, azken egunetan Tolosaldeko alkate batzuen aldebakarrekotasun jarrerak harrituta utzi gaitu. Ez zaigu iruditzen protagonismo bila aritzeko gaia eta garaia denik. Eskualde bezala jokatzeko momentua da, guziak noranzko berean lan egitekoa. Denak ados gaude herritar guztien osasun beharrak bermatuko dituen Ospitale Publiko bat behar beharrezkoa dugula. Horretan denak ados egonda, erabaki dezagun denon artean zer nolako osasun arreta nahi dugun Tolosaldean.

Ez dugu uste zain egoteko garaia denik, proposamen zehatzak egiteko eta erabakiak hartzeko garaia baizik. Argitu beharreko puntuei heltzeko garaia da:

  • Tolosaldeko osasun arretaren definizioa.
  • Asuncioneko langileen etorkizuna.
  • Ospitale berriaren kokapena.
  • Prozesu guzti hau aurrera eramateko epeen zehaztapena

Alkate Mugimendutik, Asunciongo langileen etorkizunaren inguruan eta ospitale berriaren kokapenaren inguruan proposamen zehatzak ditugu.

Esaterako, Tolosaldeko Ospitale publikoa eraikitzeko leku posible bezala Apattako bigarren fasea proposatzen dugu. Industriagune izatera bideratutako lurrak diren arren, egungo industriaren egoera kritikoa kontuan hartuta eta eskualdeak duen behar historiko hori balantzan jarriz, erabat zentzuduna iruditzen zaigu, industriara bideratutako lur horiek eskualderako osasun zerbitzua emango duen ospitale publiko batera bideratzeko aukera aztertzea.

Hala ere, garbi utzi nahi dugu hauek proposamenak baino ez direla. Erabakiak guztion artean adostuak izan behar dute, benetako erabaki gunea Tolosaldeko osasun mahaiak izan behar du eta hori horrela izanda, guk bertara eramango ditugu gure proposamenak. Mahai horretan adostu beharko da kalitatezko osasun arreta bermatzeko erarik egokiena zein den.

Hau garbi utzita, udal, gizarte eragile eta sindikatuekin erronda bat irekitzera goaz datozen asteetan. Bada garaia Eusko Jaurlaritzarekin lanketarako ahal den ordezkaritza zabal eta anitzena osatzeko eta eskualdetik ahots bakarra izateko.

Alkateen Mugimendutik argi adierazi nahi dugu Tolosaldeko osasun mahaia osatzea premia handikoa dela.

Zu hemen zaude: Albiste nabarmenak
logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.