- 2023 Martxoa 27
Udalak 196.215 euroko dirulaguntzak lortu ditu Fleming Herri Eskolako azpiegituretan inbertitzeko
Amasa-Villabonako Udalak, eskola publikoaren instalakuntzak eta azpiegiturak hobetzeko eskatutako dirulaguntza guztiak onartu ditu Eusko Jaurlaritzak. Udalak guztira lau proiektu aurkeztu zituen Eusko Jaurlaritzak urtero zabaltzen duen "Udalaguntza_2022" dirulaguntza lerrora eta proiektu guztietan aurrekontuaren %60ko dirulaguntza ematea onartu da, pasa den astean argitaratu zen ebazpen ofizialaren bidez.
Diruz lagunduko diren lau proiektuak
1. Arratzaingo eraikinean galdarak aldatu eta Gasa sartzea
Duela pare bat urte, udalak Otelarre auzora Gas hodiak eramateko inbertsioa gauzatu zuen, besteak beste Arratzaingo futbol zelaian eta eskoletan Gasa erabiltzeko urratsa eman ahal izateko. Kontuan izan behar da Arratzaingo hezkuntza eraikinetan oraindik Gasoleoa erabiltzen dela erregai gisa eta aurrerantzean erregai fosil eta kutsakor hori erabiltzeari uztea da helburu nagusia. Horrela, galdarak Gas Naturalaren erabilerarako egokitu beharko dira, batzuk aldatu ere egingo dira eta galdara-gelara gasa eramateko azpiegitura osoa (gehienbat hodi edo tuberia bereziak) ezarri beharko da. Proiektu hau gauzatzen denean, aurrera urrats esanguratsua egingo da eskola publikoetan ere gauzatu behar den energia-trantsizioan.
Proiektu honek guztira 132.023,16 euroko aurrekontua da eta udalak 79.213,90 euroko dirulaguntza lortu du.
2. Arratzaingo eskoletako erdialdeko patioa estaltzea
Arratzaingo eraikinak "U" forma dauka eta iparraldera ematen duen fatxadan barrualdeko patio bat dauka haur parke batekin. Proiektu honen bidez, patio hori estaliko duen estalki berri bat ezarriko da, patioa guztiz estaliz eta euriaz babestuz. Horrela, bertako ikasleek euriaz babestutako beste jolas-eremu berri bat izango dute.
Proiektu honek 148.135,27 euroko aurrekontua du eta udalak 88.881,16 euroko dirulaguntza eskuratu du.
3. Komun egokitu berri bat egitea Arratzaingo eraikineko behe solairuan
Arratzaingo eskoletako sarrera ondoan mugikortasun urriko ikasleentzat erabilgarria izango den komun egokitu berri bat eraikiko da.
Obra honek 25.663,20 euroko aurrekontua du eta udalak 15.397,92 euroko dirulaguntza lortu du.
4. Arroako eraikinean gelak elkartzeko tabike mugikorrak ezartzea
Arroako eskolan (Haur Hezkuntza zentroan) bi gela bateratzeko aukera ematen duten eta ireki edo itxi daitezkeen tabike mugikorrak jarriz, gela horiek erabilera anitzagoak izan ahalko dituzte. Horrela, gelak bateratu eta handitzeko aukera izango da, edo erdibitu eta txikitzekoa, komeni denean tabike mugikorrak kenduz edo jarriz. Proiketu honekin espazioen aprobetxamendu handiagoa lortuko da eta haur taldeen tamainaren arabera gelak egokitzeko aukera eskainiko diote hezitzaileari.
Tabike mugikor hauen instalazioa egiteko obrak 21.204,49 euroko aurrekontua du eta udalak 12.722,69 euroko dirulaguntza eskuratu du.
Udalak eskola publikoaren azpiegiturak hobetzeko inbertsio-planarekin jarraitzeko konpromisoa
Azken urteetan egin den bezalaxe, behin dirulaguntzen ebazpena ezagututa, udal gobernu taldea Fleming Herri Eskolako zuzendaritzarekin bilduko da 2023ko inbertsio-planaren nondik norakoak adosteko; obrak egiteko egutegia, lehentasunen finkapena, datorren urterako inbertsioen aurreikuspenak...
Udal gobernuak legealdi honetan Fleming Herri Eskolaren eraikin eta instalakuntzak hobetzeko egin den lana azpimarratu du, eskolako zuzendaritzarekin izandako elkarlana oso positiboa izan dela baloratu du eta aurrerantzean ere urtez-urteko inbertsio planekin jarraitzeko konpromiso sendoa duela adierazi du.
- 2023 Martxoa 20
Olaederra kiroldegiko bazkideek beste 151 kirol instalazio erabili ahal izango dituzte Mugiment Kirol Txartelarekin
Amasa-Villabonako Olaederra kiroldegiak Mugiment Kirol Txartelarekin bat egin du, beraz, hemendik aurrera, Olaederrako bazkideek beste udalerrietako kirol-instalazioak erabiltzeko aukera izango dute, inolako kostu gehigarririk gabe. Gainera, bazkide berriak erakartzeko kanpaina berri bat ere abiarazi da: apirilaren 30era arte, Olaederrako bazkide egin nahi dutenek ez dute matrikularik ordaindu beharko.
Mugiment Kirol Txartelera batzearekin herritarren artean kirola sustatzeaz gain, kiroldegiko bazkide direnentzat doako kirol eskaintza zabaldu nahi da. Hemendik aurrera, Olaederra kiroldegiko bazkideek beste udalerrietako kirol instalazioak erabiltzeko aukera izango dute, eta era berean, beste herrietako kiroldegietako abonatuek ere Olaederrako instalakuntzez disfrutatu ahal izango dute.
Gaur egun, 151 kirol-instalaziotan erabil daiteke Mugiment Kirol Txartela; Kiroldegiak, frontoiak eta igerilekuak barne. Udalerri horien artean daude Tolosa, Donostia, Ibarra, Beasain, Azpeitia, Eibar, Pasaia, Orio, Zumaia, Zarautz, Zumarraga etab. Esan bezala, une honetan guztira Araba, Bizkaia eta Gipuzkoako 151 udalerri daude aukeran.
Mugiment txartela, doako txartel birtual bat da, eta Olaederra kiroldegiko bazkide guztiek eskuratu dezakete. Horretarako Mugiment Kirol Txartelaren app-a instalatu behar da telefono mugikorrean.
Nola eskuratu daiteke Mugiment txartela?
Sistema oso erraza da. Txartel digitala lortzeko Google Play eta App Store-n eskuragarri dagoen aplikazioa instalatu behar da telefono mugikorrean. Aplikazioan behar bezala erregistratzeko, datuak sartu beharko dira: e-posta helbidea, NAN zenbakia, eta abonatutako instalazioaren izena. Olaederra kiroldegiak balioztatu eta notifikazioa jaso ondoren, Mugiment Kirol Txartela erabilgarri egongo da.
Behin izena emanda, aplikazioan sartu, herri ezberdinetako kirol instalakuntzen zerrenda ireki, erabili nahi den instalazioa aukeratu eta bertako sarrera eskuratu behar da. Behin eragiketa hori eginda, erabili nahi dugun kiroldegiko harreran, aplikazioan dugun sarrera eta NANa erakustearekin nahikoa izango da.
Interneteko konexiorik gabeko telefonoa duten bazkideek Olaederra kiroldegiko harrerara gerturatu beharko dute informazio gehiago jasotzeko.
Mugiment Kirol Txartela erabiltzeko kiroldegi bakoitzak bere baldintzak eta ordutegiak ezarri ditu. Gure kasuan, kiroldegiko instalakuntza osoa jarri dugu aukeran: gimnasioa, igerilekua, sauna eta hidromasajea. Dena den, beste udalerrietatik datozenek ordutegi jakin batean soilik erabili ahalko dituzte Olaederrako instalakuntzak: astelehenetik ostiralera 10:00etatik 15:00etara, eta larunbatetan 12:00etatik 17:00etara. Beraz, lasai egon daitezela Olaederrako erabiltzaileak, erabiltzaile gehien daukagun tarteetan ez baita kanpokoentzat erabilgarri egongo.
Bazkide egiteko kanpaina berezia
Udalak eta Olaederra kiroldegiak elkarlanean bazkide berriak erakartzeko sustapen kanpaina berri bat jarri dugula martxan. Horrela, Olaederrako bazkide egiteko garaian, matrikula doakoa izango da datorren apirilaren 30era arte.
Amaitzeko, Olaederra kiroldegiko bazkide egiteko gonbidapena egin nahi diegu Amasa-Villabonako eta Aiztondo bailarako herritarrei. Bertako ateak zabalik ditugu, anima zaitezte!
- 2023 Martxoa 13
Geuretik sortuak egitasmoaren baitan, Eñaut Aiartzaguena komikigilea izango dugu Amasa-Villabonan
Gaur eguerdian, Udalbitzaren Geuretik Sortuak kultur ekimenaren baitan, Amasa-Villabonan izango dugun sortzailearen aurkezpena izan da Udaletxeko Batzar areto nagusian. Eñaut Aiartzaguena Iurretako komikigilearekin batera izan dira Beatriz Unzue alkatea eta Xabat Laborde alkateordea.
Hauek izan dira Beatriz Unzue alkatearen hitzak:
“Amasa-Villabonako udalak Geuretik Sortuak kultur ekimenaren bigarren edizioan parte hartuko du.
Egitasmo honen bidez Euskal Herriko hainbat udalerritan sormen egonaldiak burutzeko bekak eskaini zaizkie kultur sortzaileei, hauek euskaraz izango diren nobela motzak, antzezlanak, film laburrak edo komikiak sortu ditzaten.
Geuretik sortuak egitasmoaren bigarren edizio honetan guztira 23 kultur sortzailek eta Euskal Herri osoko 39 udalerrik parte hartuko dute. Udalbiltza Patzuergoko balioespen batzordeak horrela erabakita, Eñaut Aiartzaguena Iurretako komikigilea izango dugu Amasa-Villabonan bere sormen lana garatzen. Eñautek Arte Ederretako ikasketak burutu zituen eta hezkuntza ez formaleko hezitzaile gisa jardun du hainbat elkarteetan. Hiru asteko denbora eta espazioa izango ditu berak aukeratutako gaia garatzeko, eta Amasa-Villabonako herritarrekin eskuz esku lantzeko.
Eñautek garatutako lana, eta baita gainontzeko udalerrietan landuko diren sormen lanak ere, kultur zirkuitu batean aurkeztuko dira 2024. urtean.
Iaz Maitane Perez idazlearekin izandako esperientziak zapore gozoa utzi zuen herrian, beraz, aurten ere kultur sorkuntza sustatzeko ekimen honetan parte hartzen jarraitzea erabaki dugu.
Amasa-Villabonako udalean harro gaude Geuretik Sortuak kultur ekimeneko partaide izateaz. Guretzako oso pozgarria da, geurera etorritako kultur sortzaileen bidez, Amasa-Villabonan bertan sortutako kalitatezko kultur ekoizpena edukitzea.
Udalak 2023 eta 2024 urteetan zehar egitasmo hau garatzeko guztira 21.713,70 euroko ekarpena egin du Udalbiltza partzuergoarekin sinatutako Lankidetza Hitzarmenaren bidez. Aurten horietatik 13.813,70 euro bideratuko dira sorkuntza fase osoa garatzeko, eta 2024. urtean beste 7.900 euro ezarriko dira Geuretik Sortuak egitasmoan beste udalerrietan osatutako ekoizpenen kultura-zirkuituaren parte izateko”.
Agerraldiari amaiera emateko, Eñaut Aiartzaguenak jorratuko duen komikiaren printza batzuk aurreratu ditu. Azaldu duenez, sorkuntza lanaren interesgunea basoa izango da, eta mendietako istorioekin zein izaki mitologikoekin uztartuko du. Komikiaren bidez Amasa-Villabonako mendien balio ekologikoa mahaigaineratu nahi du. Haurrei zuzendutako komikia izango da.
