Albisteak
- 2021 Apirila 08
Udalak neurriak hartuko ditu, gero eta hondakin gehiago uzten baitira lurrean botata
Udal garbiketa zerbitzuetako langileek eta Udaltzaingoak azken aldian edukiontzietatik kanpo lurrean uzten diren hondakinen kopurua igo egin dela egiaztatu dute eta Amasa-Villabonako udal gobernu taldeak egoera honekin amaitzeko neurriak hartuko dituela jakinarazi du.
Honakoa da udal gobernuak sare sozialen bidez zabaldu duen mezua: "Horrela daude gaur herriko edukiontzien guneak (hainbat argazkitan hondakinak lurrean botata argertzen dira). Zer gertatzen ari da? Hau onartezina da! Udalak dituen bitarteko guztiak erabiliz, jokabide zikin eta arduragabe hauen kontra joko du zalantzarik egin gabe. Ez dugu beste alde batera begiratuko. Gogorarazten dugu hondakinak edukiontzietatik kanpo lurrean uzteak 90€ eta 450€ arteko isuna dakarrela eta Udaltzaingoak jarraipen berezia egingo diola gai honi".
- 2021 Martxoa 31
Udalbatzak AECC elkarteak aurkeztutako adierazpen instituzionala onartu du
Otsailaren 4a Minbiziaren aurkako Nazioarteko Eguna izan zen, eta horren harira, AECC elkarteak adierazpen instituzional bat aurkeztu zuen Amasa-Villabonako udalbatzak ere bere egin zezan.
Atzo arratsaldean izan zen ohiko osoko bilkuran, udalean ordezkaritza duten hiru alderdiek bat egin zuten testuarekin eta aho batez onartu zuten minbiziaren aurkako elkarteak proposatutako adierazpena.
Ikusi hemen AECC elkarteak aurkeztutako adierazpen instituzionala.
- 2021 Martxoa 31
Udalak terrazen tasa suspentsioan mantenduko du, ostalaritzari karga arintzeko
Covid-19ak eragin duen osasun egoerak karga handia erantsi dio ostalaritzaren sektoreari. Gainera, urtarrilean ere derrigorrezko beste itxiera bat pairatu behar izan zuten gure herriko ostalariek. Hori horrela, sektoreari bultzada bat emateko, eta soinean daraman karga arintze aldera, udalaren esku dagoen terrazen tasa suspentsioan mantenduko da. Era berean, taberna eta jatetxeetako terrazen gaia arautzen duen ordenantza fiskala ere aldatu egin da.
Ikusi hemen ordenantza fiskala.
Atzo arratsaldean izandako ohiko batzar orokorrean Ogasun batzordearen proposamen hau aho batez onartu zute alderdi guztiek.
