Amaitu dira Seaska haur eskolako jolastokia eraberritzeko lanakAmaitu dira Seaska haur eskolako jolastokia eraberritzeko lanak
- Post 2022 Ekaina 16
Lan hauek amaituta, aurrerantzean, Seaskan matrikulatzen diren haur txikiek jolasteko eremu berri eta ederra izango dute. Dagoeneko jolastokia estreinatu dute, gaur irten baitira lehen aldiz eta bero handia badago ere, oso gustora aritu dira jolasean. Seaskako hezitzaileak pozik agertu dira eraberritzearekin eta udalak ere balorazio oso positiboa egin du.
Udal gobernuak kalitatezko Haur Hezkuntza publikoaren alde lanean jarraituko duela adierazi du eta zerbitzua doakoa izan beharko lukeela aldarrikatu du. Zentzu horretan, Seaska haur eskolako matrikulazioak ordaintzeko udalaren dirulaguntza martxan dagoela gogorarazi dute udal ordezkariek.
Honako lanak egin dira jolastokia eraberritzeko:
• Lehen zegoen kautxozko lurzoru zaharkitua kendu da eta egurrezko etxola lekuz aldatu da.
• Belar artifizialaren azalera berri batzuk ezarri dira.
• Akazi egurrezko enbortxoak eta pergola berri bat jarri dira.
• Hondarrarekin jolasteko eremu berri bat sortu da.
• Bi tutu handi jarri dira, haurrek jolasteko.
• Egurrezko elementu berriak jarri dira.
Guztira, 22.527,10 euroko inbertsioa egin du Udalak jolasgune berri hau eraikitzeko, eta Kimu bat enpresa izan da proiektua diseinatu eta lanak exekutatu dituena.
