Kategoria: Nabarmenak
- 2021 Maiatza 11
Gaztelekuari buruzko hausnarketa prozesu parte hartzailea abiatu da
Hamar urte pasa dira Katea Etxea Gaztelekuaren zerbitzua martxan jarri zenetik, eta udalak gazteriari zuzendutako zerbitzu publiko honen jarduera hobetu eta zabaltzeko helburua duen prozesu bat martxan jartzea erabaki du.
Aurten amaituko da Gaztelekuaren kudeaketa garatzeko zerbitzu kontratua eta momentu egokia da orain arteko ibilbidea aztertu, eta, aurrerantzean zerbitzu hau hobetzeko prozesu bat burutzeko. Prozesu honekin, gazteen iritzi eta beharrak zeintzuk diren identifikatu nahi dira, ondoren eskaintzen den zerbitzuari buruzko hausnarketa egiteko eta kontratu berrian aldaketak txertatzeko.
Prozesua gidatuko duen lantaldea eratu da: lantalde hori Aitziber Murua udaleko gazteria teknikaria, Amagoia Agirre hezkuntza zinegotzia, Gorka Kamio gazteria zinegotzia eta Maitane Bravo eta Garikoitz Iturbe gaztelekuko hezitzaileek osatzen dute. Prozesu honek 2 fase izango ditu:
Lehenengo fasea: apirila-ekaina
Helburua Amasa-Villabonako ikastetxeetako 12-17 urte bitarteko nerabe eta gazteen beharrak eta nahiak identifikatzea.
Herriko ikastetxeekin lankidetzan garatuko da eta galdetegi eta dinamiken bidez nerabe guztien iritziak jasoko dira, bai gaztelekuko erabiltzaileak direnenak eta baita gaztelekuko jarduna ezagutzen ez dutenenak ere.
Bigarren fasea: iraila-abendua
- 9-11 urte bitarteko nerabeek (LH 4/5/6) dituzten beharrak identifikatzea ikastetxeekin elkarlanean: adinari egokituriko mugimenduzko dinamikak eta ahozko elkarrizketak erabiliko dira
- Gaztelekuarekin lan-harremana duten eragileetako (Kale Hezitzaileak eta Gizarte Zerbitzuak) profesionalekin lanketa: nerabeek izan ditzaketen gabezi edo beharren inguruko iritzi kualifikatuak jasoko dira.
- Gurasoen parte hartzea: 9-17 urte bitartekoen gurasoen iritzi edo hausnarketak jasotzea, beraiek zein haien seme-alabek herriarekiko izan ditzaketen beharrak identifikatzeko.
Prozesu parte hartzaile hau amaitzen denean, lantaldeak bere ondorioak edo interpretazioak aterako ditu eta publikoki jakinaraziko ditu.
Udalaren helburua interesa dutenei entzunez eta iritziak kontuan hartuz, gazte eta nerabeei zuzendutako udal zerbitzu publiko hau hobetzea eta eraginkorragoa bilakatzea da.
Kategoria: Nabarmenak
- 2021 Maiatza 07
Udaleku irekiak antolatu ditu Udalak uztailaren 1etik 21era
HH 2 eta LH4 arteko haurrek izango dute non gozatua aurtengo udaran, izan ere, uztailaren 1etik 21era Udaleku irekiak antolatu ditu Udaleko Gazteria sailak.
Astelehenetik ostiralera, goizeko 09:30etan egingo dute hitzordua, eta, eguerdiko 13:00ak arte egitarau desberdinak izango dituzte egunero.
HH2 urtekoek ordu erdiko malgutasuna izango dute bai sartzerako garaian eta baita ateratzerakoan ere.
Plaza mugatuak
Amasa-Villabonan erroldatutako haurrek dute udaleku irekietan izena emateko lehentasuna, dena den, plazak baino haur gehiagok emango balute izena, zozketa bidez erabakiko da zeinek hartuko duen parte.
Aldiz, Amasa-Villabonan erroldatuta ez dauden haurrekin itxaron zerrenda bat sortuko da, eta, plaza libreak geratuz gero, udaleku irekietan parte hartzeko aukera izango dute.
Kuotak eta hobariak
Amasa-Villabonan erroldatuta dauden haurrek 83,20 euro ordaindu beharko dituzte, eta bigarren neba-arrebatik aurrerakoek 43, 69 euro.
Bestetik, Amasa-Villabonan ez erroldatuek 124,81 euro-ko kuota ordaindu beharko dute, eta bigarren neba-arrebatik aurrerakoek 65,52 euro.
Udalerrian erroldatutakoek eta lanbide arteko gutxieneko soldatara iristen ez diren bizikidetza unitateko kideek %90eko hobaria izango dute.
Goizeko haur txoko zerbitzua
Goizeko 08:00etatik 09:30etara haur txoko zerbitzua eskainiko da. Hemen ere, plazak baino haur gehiagok emango balute izena, zozketa bidez erabakiko dira parte hartzaileak.
Zerbitzu honetaz baliatu nahi duten Amasa-Villabonako haurrek 20,23 euro ordaindu beharko dituzte, eta, bigarren neba-arrebatik gorakoek 13,15 euro.
Herrian ez erroldatuek ordaindu beharrekoa, berriz, 29,34 euro haur bakoitzeko, eta bigarren neba-arrebatik aurrerakoek, 18,21 euro izango da.
Izen-ematea, maiatzaren 17tik 26ra
Udaleku irekietan izena emateko interesa dutenek, maiatzaren 17tik 26ra izango dute aukera: astelehenetik ostiralera, 09:00 – 14:00 ordutegian, Udaletxeko Herritarren Arreta Zerbitzuan (HAZ). Arratsaldeko ordutegia nahiago dutenentzat, hemen ere astelehenetik ostiralera, Villabonako Gaztelekuan, 16:00etatik 18:00etara.
Aurkeztu beharreko dokumentazioa
- Izena emateko orria bete eta sinatu: IZENEMATE ORRIA
- Gizarte Segurantzako haurraren txartel indibidualaren fotokopia.
Hobariak eskatzeko Zerga ziurtagiria edo ez duten kasuetan Bizikidetza Unitateko kide guztien diru-sarreren ziurtagiriak aurkeztu beharko dira.
Ekainaren 24an, gurasoekin bilera
Urtero bezala, aurten ere udalekuak hasi baino lehen, gurasoekin bilera egingo da eta programa aurkeztuko da. Ekainaren 24an izango da bilera hori, Gure Antzokian, arratsaldeko 17:00etan.
Informazio gehiagorako
Herritarren Arreta zerbitzua: E-mail hau spam roboten kontra babestuta dago. JavaScript aktibatuta izatea behar duzu hau ikusteko. edo 943 69 21 00
Gazteria saila: E-mail hau spam roboten kontra babestuta dago. JavaScript aktibatuta izatea behar duzu hau ikusteko. edo 943 69 47 87 / 691 366 502
Kategoria: Albisteak
- 2021 Maiatza 07
Maiatzean, BiziLabe zientzia-tailer irekiak egingo dituzte Amasa-Villabonako eta Adunako plazetan
Maiatzaren 21ean Amasa-Villabonan, eta 22an Adunan egingo dira saioak. Doakoak dira eta izen-ematea maiatzaren 10ean zabalduko da.
Martxoan Tolosaldeko bost herritan egin bezala, BiziLabe zientzia-tailer irekiek eskualdeko beste bi herritako plazak hartuko dituzte.
Gazteak, aisialdi giro batean direla, Zientzia, Teknologia, Ingeniaritza, Artea eta Matematika alorretan trebatzeko egitasmoa da BiziLabe.
Eskolaz kanpoko jardura modura, ikasturte osoko eskaintza iraunkorra izan da aurten Tolosan eta Amasa-Villabonan. Tailer irekiek, berriz, bertan egiten dituzten jarduerak gertutik ezagutzeko aukera emango dute.
