Kategoria: Nabarmenak
- 2021 Apirila 23
150 urte dituen Laumugarrietako mugarri zaharra berreskuratu dute
Zizurkilgo mugarriak dokumentatzeko lanaren baitan, Amasa-Villabona, Zizurkil, Asteasu eta Anoetak muga egiten duten puntuan kokatutako Laumugarrieta mugarria berreskuratu du Hernandorena kultur elkarteak Aranzadirekin elkarlanean. Orain dela 150 urte jarritako harria Zalberro bezala ezaguna den inguruan dago kokatu eta 300 kg ditu.
Kultur elkarteko kideek aztertutako dokumentuetan Laumugarrietaren arrastoak topatu zituzten; horren bila hasitakoan, lurpean topatu zuten 1871an jarritako mugarria.
Asteazkenean, apirilaren 21ean, Hernandorena kultur elkarteko kideek Amasa-Villabonako, Zizurkilgo, Asteasuko eta Anoetako alkateak herriek muga egiten duten puntuan egindako ekitaldira gonbidatu zituzten. Horrela, alkate bakoitzak bere herriko eremuan dagoen zatian teila zati bat jarri eta gorriz margotu zuten mugarriaren gainean zizelkatutako herriaren iniziala.
Argazkia: www.ataria.eus
Kategoria: Albisteak
- 2021 Apirila 23
Iñaki Arregi ikerketa bekaren deialdia zabaldu du UEMAk
UEMAk Iñaki Arregi ikerketa beka sortu zuen 2019an, udalerri euskaldunen garapena aztertzeko, ikerketa sustatzeko eta euskal soziolinguistikaren inguruko ezagutza areagotzeko. Orain bigarren deialdiaren oinarriak zabaldu ditu Mankomunitateak, eta laguntza jaso nahi duten egitasmoek maiatzaren 28ra arteko epea izango dute laginak aurkezteko. Eusko Jaurlaritzaren babesa du bigarren deialdi honek, Gipuzkoako Foru Aldundiaren, Kontseiluaren eta UEUren laguntzarekin batera. Bi lan sarituko dira, bakoitza 6.000 eurorekin.
Hainbat eragileren artean azken urteotan egindako jardunaldietan nabarmendu izan den moduan, udalerri euskaldunak garatzea da arnasguneei eusteko modurik eraginkorrena. Ondorio horri tiraka, udalerri euskaldunak garatzeko askotariko moduak ikertu eta landu nahi ditu bigarren deialdi honek, horretarako oinarri izan daitekeen esparruetako batetik abiatuta: demografikoa, sozioekonomikoa, soziokulturala edo sozioekologikoa, besteak beste.
Kategoria: Albisteak
- 2021 Apirila 21
Euskara sustatzeko dirulaguntzak onartu ditu Udalak
Martxoaren 30ean izandako Tokiko Gobernu Batzordean, Udalean ordezkaritza duten alderdi guztiek aho batez onartu zituzten Euskara sustatzeko 2021 urterako dirulaguntzak.
Tokiko hedabideekin hitzarmenak, euskararen normalizazioan eragiteagatik
Tokiko euskarazko hedabideek burutzen duten lana ezinbestekoa da Euskararen normalizaziorako eta sustapenerako. Era berean, gertuko eta kalitatezko kazetaritza ere eskaintzen dutenez, beharrezkotzat jo du Udalak, aurten ere, hauekin hitzarmen bereziak sinatzea. Hori horrela, 2021ean Villabonako Udalak komunikabideetara dirulaguntza hauek bideratuko ditu:
• Tolosaldeko Ataria argitaratzen duen Tolosaldeko Komunikazio Taldea S.M.ri: 26.775 euro.
• Aiurri hamaboskaria argitaratzen duen Erroizpe Baltzu Mugatuari: 17.850 euro.
• 28 Kanala telebista ekoizten duen Tolosako Komunikabideak S.L.ri: 6.000 euro.
