Udalak 16.000 euro bideratuko ditu El Salvadorreko Jocoaitique herriak ur hornidura izan dezan
- Post 2021 Ekaina 23
Atzo izandako Amasa-Villabonako Tokiko Gobernu Batzordean aho batez onartu zen Villabonako udalaren eta Euskal Fondoaren arteko lankidetza hitzarmena.
Hitzarmen honen bidez, Udalak 16.314,39 € bideratuko dizkio Euskal Fondoari, honek El Salvadorreko Morazaneko Iparraldean kokatzen den Jocoaitique herrian uraren hornidura eta saneamendua hobetzeko proiektua finantzatzatu dezan.
Euskal Fondoaren gidaritzapeko proiektu honen helburua da ur-hornidura hobetzea Meanguera, Jocoatique, Torola, Arambala, Villa El Rosario eta San Fernando komunitateetan; horretarako, arroilen eta ibaien kontaminazioa murriztuko da ur grisak tratatzeko sistemak abian jarriz San Luis II kolonian zein Milagro de la Paz eta Ladrillera de Meanguera guneetan.
Horrela, zonalde horretan bizi diren 2.000 biztanle inguruk edateko ura izango dute eta herritar horien baldintza higieniko eta sanitarioak nabarmen hobetuko dira.
Onartu berri den lankidetza-hitzamen honekin Amasa-Vilabonako Udalak elkartasun politikekin eta garapenerako nazioarteko lankidetzarekin duen konpromisoari eusten dio.
