24Maiatza2024

002.jpg

Nabarmenak

Nabarmenak

 

bannerra GIDARENA

 

            BaliabideenGida-English     BaliabideenGida-Française

 

ALBISTEAK

Jaien testuinguruan indarkeria matxistari aurre egiteko protokoloa osatu dute Udalak eta Akain Talde Feministak

20230714Protokoloa

Garagardo azokan eta Santio festetan herritar guztien segurtasuna eta ongizatea bermatu nahi ditu Amasa-Villabonako Udalak, eta, horretarako, Akain Talde Feministarekin lankidetzan, indarkeria matxistaren aurkako protokolo bat diseinatu eta onartu du. Tamalez, udako jaien testuinguruan emakumeen eta hetero-arautik kanpoko genero-identitatea eta/edo sexualitatea duten pertsonen aurkako eraso fisiko, sexual, psikiko...  gertatzen direla kontuan izanik, Udalak eta tokiko mugimendu feministak bat egin dute eraso horiei modu sendo eta antolatuan aurre egiteko.

Aste honetan Udalak protokolo honen edukien berri eman die Santio Jai Batzordeko kideei eta Villabonako tabernariei.

Indarkeria matxista modu integralean jorratu beharreko gaia da eta beraz, hainbat segurtasun baliabide eta neurri martxan jarriko dira datozen ospakizun egunetan:

  • Puntu Morea "Indarkeria sexistarik gabeko gunea"Emagin elkarteko bi formatzaile profesional egongo dira Kale Berria 40an, Berdura plaza ondoan ezarriko den gunean. 12 urtetik gorakoentzat materiala eta zerbitzua eskainiko dute honako egun eta ordutegian:
    • Uztailak 15, 19:00-22:00
    • Uztailak 24: 11:30-14:30
    • Utailak 27: 17:00-20:00
    • Uztailak 28: 17:00-20:00

  • Telefono zerbitzua: 697 11 66 11
    Edozein indarkeria edo eraso matxista pairatu edo ikusi duten pertsonek telefono honetara deitu ahal izango dute, eguneko 24 ordutan. WatsApp bidezko mezu edo audioak ere bidaltzeko aukera egongo da. Telefono zerbitzu berezi honen funtzionamendua, Akain Talde Feministako kideen artean bermatuko dute.

  • Besoko morea eramango duten boluntarioak
    Mugimendu feministako kide diren hainbat emakumek* besoko morea ikusgai eramango dute jaietako gune ezberdinetan eta beraiengana jo ahal izango da laguntza eskatzeko. Honekin batera tabernariek eta txosnan txanda egiten ari diren zerbitzariak laguntzeko prestutasun osoa izango dute.

  • Indarkeria matxistaren kontrako kanpaina
    Indarkeria edo eraso matxista baten aurrean nola jokatu azaltzen duten kartelak, pegatinak eta eskuorriak argitaratu eta zabalduko dira. Kartel, pegatina eta eskuorri horietan, jarraibide zehatzak agertuko dira. Kartel eta pegatinen kopuru handi bat itsatsiko da festa gunean, tabernetan, txosnetan etab. eta eskuorriak herriko postontzietara banatuko dira, eskuorriak jasotzen duen informazio baliagarri hori etxe guztietara heldu dadin.

  • Esku-hartzeko espazio seguruakHelbidea: Villabonako udaletxeko aretoa (Erreboteko plaza z/g) eta Villabonako Txoko morea (Errota auzoa 4, behea). Erasoren bat salatuz gero, biktimarekin lehen eskuhartzea egin ahal izateko espazio seguru eta lasaia izango da. Bertan lasai egoteko edo atseden hartzeko aukera izango da.

  • Erantzun dinamika: Koordinazio taldea eta batzarra
    Jaien testuinguruan eraso edo indarkeria matxista kasuren bat gertatu dela egiaztatuko balitz, honako prozedura jarraituko da:
  1. Koordinazio taldea: Lehen momentu batean Udaleko ordezkariak (alkatea eta zinegotzi bat) eta beharrezkoa balitz udal teknikariak (Udaltzainburua edo Gizarte Zerbitzuetako teknikariren bat) eta Akain Talde Feministako kideek osatutako koordinazio taldea bilduko litzateke. Talde honetan gertakariaren inguruan legokeen informazio zehatza elkarbanatuko litzateke. Talde honetako kide guztiek jasotzen duten informazioaren gaineko konfidentzialtasuna gorde beharko dute derrigorrez. Eraso edo indarkeria matxista kasuaren nolakotasunaren arabera, beharrezkoa dela erabakiko balitz, talde honetatik Batzarra biltzeko deialdia egingo litzateke.

  2.  Batzarra: Koordinazio taldeak horrela erabakiko balu, batzarra bilduko da. Batzar honetan udal ordezkariak, Akain Talde Feministako kideak, Lurgatz Talde Feministako kideak eta Santio Jai Batzordeko ordezkaritza batek parte hartuko lukete. Batzar horretan jorratu eta erabakiko da izandako indarkeria matxista kasuaren ezaugarrien arabera, zer nolako erabakiak hartuko diren gizarte erantzunaren artikulazioari dagokionez eta erabaki horrek jaietako egitarauan eragina izango duen edo ez.

Amasa-Villabonako Udalak argi utzi nahi du indarkeria matxistaren aurkako borrokan duen konpromiso irmoa, eta Akain Talde Feministarekin landutako protokolo hau aktibatu behar ez izatea espero du. Hori da helburu nagusia; jaiak guztientzako seguruak izatea eta elkarrekiko errespetuzko giroan igarotzea, inolako jarrera, portaera, jokabide edo ekintza matxistarik gabe. Horrela izan dadila.

logo-negatiboa
Erreboteko Plaza, s/n. 20.150 Gipuzkoa
Telf: 943 69 21 00 - Fax: 943 69 33 76
E-posta: E-mail hau spam roboten kontra babestuta dago. JavaScript aktibatuta izatea behar duzu hau ikusteko.